1 935 საერთაშორისო მედალი მხოლოდ 2025 წელს, ქართული სპორტის სამყარომ სპორტული მიღწევები შეაჯამა და გამარჯვებულები 8 ნომინაციაში გამოავლინა. წლის საუკეთესო სპორტსმენი არაოლიმპიურ სახეობებში, წლის საუკეთესო გუნდი სათამაშო სპორტულ სახეობებში, საუკეთესო ახალგაზრდა სპორტსმენი, წლის საუკეთესო პარასპორტსმენი ქალი, საუკეთესო პარასპორტსმენი მამაკაცი, წლის საუკეთესო ნაკრები გუნდი, წლის საუკეთესო სპორტსმენი ქალი და მამაკაცი. სპორტის სამინისტროს ვერსიით, საქართველოს 2025 წლის საუკეთესო მამაკაც სპორტსმენად მოფარიკავე სანდრო ბაზაძე დასახელდა, ხოლო საუკეთესო ქალი სპორტსმენი ძიუდოისტი ეთერ ლიპარტელიანი.

"წლის სპორტსმენის" დაჯილდოების ცერემონიას საქართველოს პრეზიდენტი მიხეილ ყაველაშვილი, პრემიერ-მინისტრი ირაკლი კობახიძე, მთავრობის წევრები და სპორტული საზოგადოების წარმომადგენლები ესწრებოდნენ. იყო სიტყვით მიმართვებიც, რა დროსაც აღმასრულებელი და საკანონმდებლო ხელისუფლების პირველმა პირებმა ქართველ სპორტსმენებს მიღწეული წარმატებებისთვის მადლობა გადაუხადეს და პირობა მისცეს, რომ სახელმწიფო შემდეგშიც მაქსიმალურ ძალისხმევას გამოიჩენს ქართული სპორტის მხარდასაჭერად.