საქართველო არის სახელმწიფო, რომელიც მდებარეობს ძალიან მნიშვნელოვან რეგიონში. ჩვენი ქვეყანა წარმოადგენს ეკონომიკურ და სატრანსპორტო კავშირს სხვადასხვა რეგიონს შორის. ბუნებრივია, ასეთ გარემოში სხვადასხვა ძალა ცდილობს გავლენის მოპოვებას, ზოგჯერ პოლიტიკურ პროცესებზე, ზოგჯერ საინფორმაციო სივრცეზე, ზოგჯერ კი საზოგადოებრივ განწყობებზე- განაცხადა რეგიონული პოლიტიკისა და თვითმმართველობის საპარლამენტო კომიტეტის თავმჯდომარის პირველმა მოადგილე, ზვიად შალამბერიძემ პარლამენტის პლენარულ სხდომაზე.
მისივე თქმით, მიუხედავად ამისა, საქართველოს საკმარისად ძლიერი სახელმწიფო ინსტიტუტები და გამოცდილება გააჩნია, რომ გამოწვევებს გაუმკლავდეს.
შალამბერიძეს მიაჩნია, რომ ზეწოლებზე და საინფორმაციო შეტევებზე პასუხი უნდა იყოს სიმშვიდე, პრაგმატული პოლიტიკა და ეროვნული ინტერესების დაცვა.
„მაგრამ ასევე უნდა ითქვას ძალიან მკაფიოდ, საქართველოს აქვს ძლიერი სახელმწიფო ინსტიტუტები, გამოცდილი პოლიტიკური სისტემა და საზოგადოება, რომელმაც უკვე არაერთი რთული პერიოდი გაიარა. ჩვენ, როგორც სახელმწიფო, ყურადღებით ვაკვირდებით ყველა პროცესს. ჩვენ ვაანალიზებთ ყველა ფაქტორს, ვხედავთ რისკებს და კარგად გვესმის, როგორ მუშაობს თანამედროვე საინფორმაციო და პოლიტიკური ზეწოლის მექანიზმები. ამიტომ ჩვენი პასუხი ასეთ მცდელობებზე არ არის პანიკა, არ არის ემოციური რეაქცია და არ არის მუდმივი თავის მართლება. ჩვენი პასუხი არის სტრატეგიული სიმშვიდე, პასუხისმგებლიანი პოლიტიკა და ქვეყნის ინტერესებზე დაფუძნებული გადაწყვეტილებები.
მინდა ამავე დროს საზოგადოებას პირდაპირ მივმართო. დღეს ყველაზე მნიშვნელოვანი არის, რომ ჩვენ ყველამ ერთად შევინარჩუნოთ სიმშვიდე და სიფხიზლე. არ გავხდეთ პროვოკაციების ნაწილი, არ დავუშვათ, რომ ეჭვი და გაურკვევლობა გახდეს საზოგადოებრივი განწყობის საფუძველი. სწორედ ასეთ პირობებში იწყებს მუშაობას ყველაზე ძლიერი დაცვა… საზოგადოების გააზრებული პოზიცია. როდესაც საზოგადოება ხედავს მთელ სურათს, როდესაც ესმის პროცესების ლოგიკა, მაშინ ნებისმიერი საინფორმაციო შეტევა კარგავს თავის მთავარ ძალას, გავლენას საზოგადოებრივ განწყობებზე. ჩვენ უნდა გვესმოდეს, რომ მომავალშიც იქნება მსგავსი მცდელობები. იქნება სხვადასხვა განცხადებები, სხვადასხვა შეფასებები და სხვადასხვა საინფორმაციო კამპანიები. საქართველოს ხელისუფლება გააგრძელებს იმ პოლიტიკას, რომელიც ეფუძნება პასუხისმგებლობას, პრაგმატიზმს და ქვეყნის ეროვნული ინტერესების დაცვას. და დარწმუნებული ვარ, რომ სწორედ საზოგადოების სიფხიზლე, ერთიანობა და გააზრებული პოზიცია იქნება ის ძალა, რომელიც ნებისმიერ მსგავს მცდელობას საბოლოოდ აზრს დაუკარგავს“ - განაცხადა ზვიად შალამბერიძემ.