ანალიტიკოსი და მკვლევარი ნიკა შენგელია აცხადებს, რომ დედაქალაქში თხევადი აირით (LPG) მოვაჭრე ობიექტების ირგვლივ სერიოზული კრიზისი მწიფდება. საწვავის ბაზარზე შექმნილ ვითარებას და ზოგადად, თხევადი აირის სექტორში არსებულ პრობლემასთან დაკავშირებით ნიკა შენგელია სოციალურ ქსელში წერს, რასაც ,,რეზონანსი" უცვლელად გთავაზობთ:

,,დედაქალაქში თხევადი აირით (LPG) მოვაჭრე ობიექტების ირგვლივ სერიოზული კრიზისი მწიფდება. ბენზინზე ფასების ისტორიულ მაქსიმუმთან ერთად, მცირე აირგასამართი სადგურები საქალაქო ხელისუფლების მხრიდან უპრეცედენტო ზეწოლის ქვეშ აღმოჩნდნენ . სასწორზე დგას არა მხოლოდ მცირე ბიზნესის ბედი, არამედ თითოეული მოქალაქის ყოველდღიური ხარჯებიც.

რატომ ახლა?

 გაზგასამართ სექტორზე ზეწოლა დაიწყო სწორედ მაშინ, როდესაც საწვავის ბაზარი კრიტიკულ ფაზაში შევიდა. საქართველოში ბენზინის ფასმა 4.10–4.35 ლარს გადააჭარბა, მაშინ როცა პროპან-ბუტანის ღირებულება დაახლოებით 1.40 ლარის ფარგლებში შენარჩუნდა.

ფასებს შორის მკვეთრმა სხვაობამ მომხმარებლები აიძულა, უარი ეთქვათ მსხვილი ბენზინგასამართი ქსელების მომსახურებაზე და არჩევანი მცირე აირგასამართ ობიექტებზე გაეკეთებინათ. სწორედ ამ დროს გააქტიურდა თბილისის მუნიციპალური ინსპექციის რეიდები.

ეს დამთხვევაა თუ ბაზარზე მსხვილი მოთამაშეების ინტერესების დაცვა — კითხვა ღიად რჩება და საზოგადოებრივი პასუხის მოლოდინშია.

ვინ უნდა აკონტროლებდეს სექტორს?

აირგასამართი სადგურები მიეკუთვნება მომეტებული ტექნიკური რისკის მქონე ობიექტებს, რაც საჭიროებს მაღალკვალიფიციურ ინჟინერ-ტექნოლოგიურ ზედამხედველობას. მსგავსი ინფრასტრუქტურის კონტროლი, საერთაშორისო პრაქტიკის მიხედვით, უნდა ხორციელდებოდეს სპეციალიზებული დარგობრივი უწყების მიერ და არა მუნიციპალური სტრუქტურების მხრიდან.

დღეს კონტროლის ფუნქცია გადაცემულია მერიას, რომლის მოქმედება, ძირითადად, ჯარიმების გამოწერით შემოიფარგლება და არ ეფუძნება სიღრმისეულ ტექნიკურ შეფასებებს. სპეციალიზებული სააგენტოს არქონა კი სახელმწიფოს პასუხისმგებლობის არიდებაზე მიუთითებს.

საინვესტიციო ხაფანგი

ბოლო ათწლეულის განმავლობაში სახელმწიფო თავად უწყობდა ხელს სექტორის განვითარებას: განხორციელდა მილიონობით ლარის კერძო ინვესტიცია, შეიქმნა სამუშაო ადგილები. თუმცა დღეს ეს   ბიზნესი გაურკვეველ მდგომარეობაში აღმოჩნდა.

ობიექტები, რომლებიც წლების განმავლობაში შეუფერხებლად ფუნქციონირებდნენ, მოულოდნელად „არალეგალურად“ ან „საშიშად“ ცხადდება. მეწარმეებს არ ეძლევათ არც ადაპტაციის ვადა და არც ალტერნატიული სივრცეები. დიალოგის ნაცვლად გამოიყენება სანქციები — 2500–5000 ლარის ოდენობის ჯარიმები ყოველდღიურ პრაქტიკად იქცა.

აღნიშნული  პროცესის შედეგები მთელ საზოგადოებას შეეხება. თბილისში კომერციული ტრანსპორტის მნიშვნელოვანი ნაწილი — ტაქსები და საკურიერო სერვისები — LPG-ზე მუშაობს.

თუ ხელმისაწვდომი გაზის ინფრასტრუქტურა შემცირდება ან გაქრება, ბიზნესი იძულებული გახდება ბენზინზე გადავიდეს, რომლის ფასი 4.30 ლარს აღწევს. ეს კი გარდაუვლად გამოიწვევს მომსახურებისა და პროდუქციის თვითღირებულების 30–40%-იან ზრდას.

მაღალი ინფლაციის პირობებში ასეთი მატება შესაძლოა, ოჯახების ბიუჯეტს მძიმე ტვირთად დააწვეს .

ამდენად, სანამ ოფიციალური პირები „ქალაქის მოწესრიგებაზე“ საუბრობენ, რეალური სექტორი გადარჩენისთვის იბრძვის. პარალელურად, მოქალაქეები  გაზრდილი ტარიფებისა და ყოველდღიური ხარჯების კიდევ უფრო გაძვირებისთვის ემზადებიან", - წერს ნიკა შენგელია Facebook-ის საკუთარ გვერდზე.