აშშ-ის ცენტრალური სარდლობის განცხადებით, აშშ-ის სამხედრო ძალებმა ირანის კეშმის კუნძულზე თავდაცვის მიზნით დარტყმები განახორციელეს. მათი მტკიცებით, დარტყმები იყო პასუხი ირანის მიერ ახლო აღმოსავლეთში განხორციელებული „თავდასხმების მცდელობებზე".

„ირანმა რეგიონული მეზობლების მიმართულებით რამდენიმე ბალისტიკური რაკეტა გაუშვა; თუმცა, დასახულ სამიზნეს ვერცერთმა ვერ მიაღწია. ქუვეითისკენ გასროლილი ორი ირანული რაკეტა გზაში ჩამოვარდა, ხოლო ბაჰრეინისკენ გაშვებული სამი რაკეტა აშშ-ისა და ბაჰრეინის საჰაერო თავდაცვის ძალებმა მოიგერიეს", - აღნიშნულია ცენტრალური სარდლობის მიერ X-ზე გამოქვეყნებულ განცხადებაში.

ცენტრალური სარდლობის ცნობით, აშშ-მა კეშმის კუნძულზე ირანის სამხედრო სახმელეთო კონტროლის პუნქტს დაარტყა, ამერიკელი სამხედროები არ დაშავებულან.

მანამდე, ცენტრალურმა სარდლობამ განაცხადა, რომ ვაშინგტონის მიერ ჰორმუზის სრუტეზე დაწესებული საზღვაო ბლოკადის ფარგლებში, ირანის მიმართულებით მიმავალ დაუტვირთავ ნავთობტანკერს დაარტყა და მწყობრიდან გამოიყვანა.

ამერიკულმა თვითმფრინავმა ბოტსვანას დროშის ქვეშ მცურავი გემის ძრავის ოთახს რაკეტა ესროლა მას შემდეგ, რაც მისმა ეკიპაჟმა რამდენიმე გაფრთხილება უგულებელყო.

ამასთან, განცხადება გაავრცელა ირანის ისლამური რევოლუციის გუშაგთა კორპუსმაც, რომლის თანახმადაც, ქუვეითზე მისი თავდასხმები იყო პასუხი აშშ-ის ძალების მიერ კეშმის კუნძულზე განხორციელებული „თავხედური და აშკარა აგრესიის". მათი ინფორმაციით, ქუვეითის მიმართულებით მინიმუმ 10 ბალისტიკური რაკეტა გაუშვეს.

ირანის ისლამური რევოლუციის გუშაგთა კორპუსის განცხადებით, თავდასხმები „საწყისი პასუხია" და გაცილებით უფრო ძლიერ საპასუხო დარტყმას განახორციელებენ.

ანალიტიკოსების დიდი ნაწილი ამას უკვე არა ერთჯერად ინციდენტად, არამედ აშშ-ირანის პირდაპირი სამხედრო დაპირისპირების ახალ ეტაპად აფასებს, რადგან ბოლო დღეებში აშშ-მ რამდენჯერმე დაარტყა ირანის სამხედრო ობიექტებს კეშმის კუნძულზე და ჰორმუზის სრუტის მიმდებარე ზონაში. ხოლო ირანმა საპასუხოდ დრონებისა და რაკეტების გამოყენებით შეუტია აშშ-ისა და მისი პარტნიორების ობიექტებს რეგიონში.

ანალიტიკოსები ძირითადად სამ საკითხზე ამახვილებენ ყურადღებას: პირველი, ჰორმუზის სრუტის კონტროლი - კეშმის კუნძული ჰორმუზის სრუტესთან მდებარეობს და სტრატეგიულ მნიშვნელობას ატარებს. ბევრი ექსპერტი მიიჩნევს, რომ ბრძოლა ახლა მხოლოდ სამხედრო ობიექტებზე აღარ არის, მხარეები ცდილობენ გავლენა მოიპოვონ მსოფლიოში ერთ-ერთ უმნიშვნელოვანეს ენერგეტიკულ მარშრუტზე.

მეორე, ჩაშლილი მოლაპარაკებები - აშშ-სა და ირანს შორის მიმდინარე სამშვიდობო და ბირთვულ საკითხებზე მოლაპარაკებები პრაქტიკულად გაჩერებულია. დასავლური მედიის ცნობით, თეირანმა გარკვეული საკომუნიკაციო არხებიც შეაჩერა, რაც ზრდის ფართომასშტაბიანი ესკალაციის რისკს.

და ბოლოს, ირანის შიდა მდგომარეობა - ზოგი ანალიტიკოსი ყურადღებას ამახვილებს ეკონომიკურ კრიზისზე, ინფლაციაზე და მზარდ სოციალურ უკმაყოფილებაზე.

მათი შეფასებით, ხელისუფლება ცდილობს გარე კონფლიქტის ფონზე შიდა კონსოლიდაცია მოახდინოს, თუმცა ხანგრძლივმა დაპირისპირებამ შესაძლოა საპირისპირო შედეგიც გამოიწვიოს. მოკლედ, დასავლურ ანალიტიკურ წრეებში ახლა ყველაზე ხშირად განიხილავენ ორ სცენარს - შეზღუდული სამხედრო შეტაკებების გაგრძელებას ან კონფლიქტის უფრო ფართო რეგიონულ ომად გადაქცევას, თუ მოლაპარაკებები საბოლოოდ ჩაიშლება. ამ ეტაპზე უმრავლესობა მაინც ფიქრობს, რომ ორივე მხარე ცდილობს ზეწოლა გაზარდოს ისე, რომ სრულმასშტაბიან ომამდე არ მივიდეს.