„ქართული ოცნება" ცდილობს ევროკავშირთან პოლიტიკური დიალოგის აღდგენის პროცესში შუამავლის როლი დააკისროს ლუქსემბურგს. თუმცა, ამავე დროს, პარტიის შიგნით არ იკვეთება ერთიანი პოზიცია იმის შესახებ, მზად არის თუ არა ხელისუფლება კონკრეტულ დათმობებზე წავიდეს იმ საკითხებთან დაკავშირებით, რომლებმაც საქართველო-ევროკავშირის ურთიერთობა კრიზისამდე მიიყვანა.

შეიძლება ითქვას, რომ აღნიშნულ საკითხზე „ქართული ოცნების" გზავნილი ორ მიმართულებად იყოფა - ერთი მხრივ, პარტია ლუქსემბურგს სთხოვს, ხელი შეუწყოს ევროკავშირთან დიალოგის განახლებას და კომუნიკაციის არხების აღდგენას, მეორე მხრივ კი, მმართველი გუნდის წარმომადგენლები ხაზგასმით აცხადებენ, რომ ცნობილ კანონებზე უკან დახევა არ იგეგმება.

შესაბამისად, ანალიტიკოსთა ნაწილი ფიქრობს, რომ ხელისუფლების ამჟამინდელი პოზიცია უფრო დიალოგის აღდგენის სურვილს გამოხატავს, ვიდრე ევროკავშირის მოთხოვნების შესაბამისად პოლიტიკური დათმობებისთვის მზადყოფნას.

ოპოზიციაში აცხადებენ, რომ ქმედითი ნაბიჯების გადადგმის გარეშე, ევროინტეგრაციის პროცესი არ აღდგება. მათი შეფასებით, უნდა შესრულდეს ის მოთხოვნები, რასაც ევროპელი პარტიორები ხელისუფლებისგან მოითხოვენ, პატიმრების გათავისუფლებიდან დაწყებული, შემზღუდავი კანონების გაწვევით დასრულებული.

რა მიზანი აქვს "ოცნებას"

კონფლიქტოლოგი პაატა ზაქარეიშვილი "რეზონანსთან" აცხადებს, რომ "ოცნებას" სურს ევროკავშირი დააბნიოს და რეალურს არაფერს არ სთავაზობს, რაც ქვეყნის ევროინტეგრაციას წაადგება. 

"ოცნებას" სურს ევროკავშირი დააბნიოს და დიალოგზე წამოიყვანოს. სამხარაძე დიალოგის აღდგენაზე საუბრობს და არა მოლაპარაკებებზე, ეს მკაფიოდ სხვადასხვა რამაა - დიალოგია, როცა ორი ადამიანი თანასწორ პირობებში ინფორმაციებს ცვლის. მოლაპარაკებებია, რაც ჩვენ უნდა გვქონდეს, როცა მხარეები პირობებს ასრულებენ. ამ შემთხვევაში, ჩვენ გვინდა ევროკავშირში შესვლა და პირობები ჩვენ უნდა შევასრულოთ.

• პაატა ზაქარეიშვილი: "ოცნებას" სურს ევროკავშირი დააბნიოს და დიალოგზე წამოიყვანოს. სამხარაძე დიალოგის აღდგენაზე საუბრობს და არა მოლაპარაკებებზე, ეს მკაფიოდ სხვადასხვა რამაა"

"ამ ფონზე, სამხარაძეს სურს სიტუაციას შეუცვალოს მიმართულება და ევროკავშირს უთხრას, მოლაპარაკებები კი არა, დიალოგი დავიწყოთო. მეორე, რაც თვალში მომხვდა ის იყო, რომ მზად ვართ გამჭვირვალობის კანონის განხილვა დავიწყოთო და არა გაუქმება, უკაცრავად, ევროკავშირი მოითხოვს, რომ გააუქმეთო. 

"ეს იმას ჰგავს, მკვლელმა რომ პოლიციაში იარაღი მიიტანოს და უთხრას, ამით ადამიანი მოვკალი და რაკი იარაღს გაბარებთ, ამიტომ მკვლელობა მაპატიეთო. კანონმა გამჭვირვალობის შესახებ უკვე "მოკლა" სამოქალაქო საზოგადოება საქართველოში, მოშალა დემოკრატიული საფუძვლები. 

"ჰიპოთეტურად ეს კანონები რომ გაუქმდეს, ნელ-ნელა 5-10 წელში სამოქალაქო საზოგადოება კი შეიკვრება, რაც გაანადგურეს.

"თუ მათ ევროკავშირთან მართლა ლაპარაკი უნდათ, მაშინ უნდა ისაუბრონ როგორი იქნება საარჩევნო კოდექსი, როგორც ჩატარდება მომავალი არჩევნები, როგორი იქნება სასამართლო რეფორმა და დეოლიგარქიზაცია, უნდა იყოს ლაპარაკი კორუფციის აღმოფხვრაზე, რაც მოლდოვამ და უკრაინამ გაიარა, ვიდრე კლასტერს გაუხსნიდნენ.

"საჭიროა იმ 9 პირობის შესრულება, რომელიც ჩვენ წამოგვიყენეს. სასაცილო იცით რა არის? ისეთ პირობებს უყენებენ, თითქოს ევროკავშირს უნდოდეს საქართველოსი გაწევრიანება",- განაცხადა ზაქარეიშვილმა.  

ანალიტიკოსი გია აბაშიძე "რეზონანსთან" აცხადებს, რომ სამხარაძეს ახალი არაფერი უთქვამს და "ქართული ოცნება" "გარედან ჩარევებს არ დაუშვებს". 

"ნიკოლოზ სამხარაძის განცხადებაში სიახლე ნამდვილად არაფერია. ოფიციალური თბილისი დიდი ხანია აცხადებს, რომ მზადაა სამუშაო რეჟიმში განიხილოს ევროკავშირთან ის დაგროვილი პრობლემები, რომლებიც ხელოვნურად თავად ბრიუსელმა შექმნა, ეს ეხება კანონმდებლობას, სხვადასხვა რეფორმებს და ა.შ. მაგრამ მთავარი შეუვალი ხაზი, რასაც საქართველოს ხელისუფლება ამბობს ისაა, რომ არანაირ ფასად სუვერენიტეტს არ დათმობს და გარე ჩარევებს არ დაუშვებს.

"რადიკალური ოპოზიციის ინსინუაციაა, რომ "ქართული ოცნება" თითქოს უკან იხევს. თითქოს რაღაც კანონებს გააუქმებს და გაიწვევს - ეს განუხორციელებელი ოცნებებია იმ ექსტრემისტული ძალებისა, რომლებსაც საქართველოში არჩევნების გზით გამარჯვება არ სურთ, რამეთუ მათ ამისთვის არანაირი შანსი არ აქვთ. საკუთარი მავნებლური დღის წესრიგისთვის კი ყოველთვის გარე ძალებს იყენებენ.

"ნიშანდობლივია ის ტელე-მიმართვა, რომელიც ევროპარლამენტარმა რასა იუკნევიჩიანემ გაავრცელა - თურმე ევროკავშირში გაწევრიანების ერთ-ერთი წინაპირობა მეორე ფრონტის გახსნა იყო და მავანს როგორ ჰგონია, ამ მორიგი აღიარების შემდეგ, საქართველო კარს გაუხსნის რომ უნამუსოდ ჩაერიონ ჩვენს პოლიტიკურ საქმიანობაში, თუ გახსნას ე.წ. მეორე ფრონტი?"- განაცხადა  აბაშიძემ.

• გია აბაშიძე: "საქართველოს ხელისუფლება არანაირ ფასად სუვერენიტეტს არ დათმობს და გარე ჩარევებს არ დაუშვებს"

კითხვაზე, მაშინ რატომ ითხოვს "ოცნება", რომ დიალოგი დაიწყოს, ამაში რა მიზანია, აბაშიძემ გვითხრა:

"ვიმეორებ, ნიკა სამხარაძეს სიახლე არაფერი არ უთქვამს, პრემიერი, პარლამენტის თავმჯდომარე და ყველა საჯაროდ აცხადებს, რომ მზადაა პრობლემური საკითხების განხილვისთვის, მაგრამ შანტაჟით, დაშინებით და სუვერენულ საქმეებში ხელის ფათურით, ევროკრატია ვერაფერს ვერ მიაღწევს საქართველოში. იმის გაბუქება, რომ თითქოს სამხარაძემ რაღაც შოკისმომგვრელი თქვა, ეს ნაცპროპაგანდის ერთ-ერთი ტრაგიკომიკური ტყუილია",- განაცხადა აბაშიძემ. 

რას აცხადებენ მმართველ პარტიაში

პარლამენტის საგარეო ურთიერთობათა კომიტეტის თავმჯდომარემ, ნიკოლოზ სამხარაძემ  განაცხადა, რომ ქართული დელეგაცია შეხვდა ლუქსემბურგის პარლამენტის საგარეო და თავდაცვის კომიტეტების თავმჯდომარეებთან და კომიტეტის წევრებთან.

"ვთხოვეთ ლუქსემბურგის მხარეს, რომ ევროკომისიასთან დააყენოს საკითხი საქართველოსთან დიალოგის განახლებაზე. შეხვედრა საკმაოდ საინტერესოდ წარიმართა. დიდი ინტერესი გამოიწვია იმიტომ, რომ ბევრი წევრი დაესწრო ამ შეხვედრას. ლუქსემბურგის პარლამენტი შედარებით მცირერიცხოვანია და ათზე მეტი წევრი იყო ამ შეხვედრაზე, ესეც ნათლად აჩვენებს იმ ინტერესს, რომელიც საქართველოს მიმართ არსებობს", - დასძინა სამხარაძემ.

სამხარაძის თქმით, მისი გუნდი მზად არის ნებისმიერ ფორმატში დიალოგის გასაახლებლად, ასევე, კრიტიკულ საკითხებზე სასაუბროდ, მათ შორის კანონთან დაკავშირებით, რომელიც ევროკავშირსა და საქართველოს შორის დიალოგის შეჩერების "ფორმალური მიზეზი იყო". სამხარაძემ განმარტა, რომ საუბარია „უცხოური გავლენის გამჭვირვალობის შესახებ" კანონზე. სამხარაძემ იმედი გამოთქვა, რომ ლუქსმბურგი მხარს დაუჭერს საქართველოსთან დიალოგის განახლებას.

"ასევე მზად ვართ კრიტიკულ საკითხებზე სასაუბროდ, მათ შორის კანონთან დაკავშირებით, რომელიც იყო ფორმალური მიზეზი ევროკავშირსა და საქართველოს შორის დიალოგის შეჩერების, ვგულისხმობ, გამჭვირვალობის კანონს. ლუქსემბურგის მხარე საკმაოდ კონსტრუქციულად მოეკიდა ჩვენს პოზიციას და იმედი გვაქვს, რომ როდესაც იქნება წევრ ქვეყნებს შორის შეხვედრები მხარს დაუჭერს საქართველოსთან დიალოგის განახლებას", - განაცხადა სამხარაძემ.

• ნიკოლოზ სამხარაძე: „მზად ვართ კრიტიკულ საკითხებზე სასაუბროდ, მათ შორის კანონთან დაკავშირებით, რომელიც იყო ფორმალური მიზეზი ევროკავშირსა და საქართველოს შორის დიალოგის შეჩერების, ვგულისხმობ, გამჭვირვალობის კანონს"

"ოცნების" დეპუტატი ირაკლი ზარქუა კი ამბობს, რომ არანაირი უკან დახევა არ იქნება.

"არანაირი უკან დახევა არ იქნება, იმიტომ რომ "გამჭვირვალობის კანონმა" და "ფარამ" შექმნა შესაძლებლობა, რომ აქ უსამშობლოების დაფინანსება მნიშვნელოვანწილად შემცირდა. ევროკავშირის ქვეყნების ნაწილიც კი იღებენ გადაწყვეტილებას, რომ „გამჭვირვალობის კანონი" მიიღონ. საქართველოს კი "აშავებდნენ", აშანტაჟებდნენ, ემუქრებოდნენ ამ კანონის გამო. ახლა თურმე ყველასთვის აუცილებელი ყოფილა ეს კანონი.

"გამჭვირვალობის კანონი" მნიშვნელოვანია. ის მოქმედებს და მომავალშიც ასე იქნება. ვინმეს თუ კითხვა აქვს, მზად ვართ ამ თემაზე ვისაუბროთ, არგუმენტირებულად ავუხსნათ, თუ რატომ იქნა ეს კანონი მიღებული. უკან დახევა რა შუაშია?! ამ კანონს არ გავიწვევთ, იმიტომ რომ ეს კანონი სჭირდება ჩვენს ქვეყანას", - განაცხადა ზარქუამ.