ვიდრე ასეთი პოლიტიკური პარტიები, როგორიც არის „ერთიანი ნაციონალური მოძრაობა“ და მისი მომიჯნავე პარტიები, ოპოზიციის ძირითად ბირთვს წარმოადგენენ, დემოკრატიული სისტემა ვერ ჩამოყალიბდება,- ამის შესახებ საქართველოს პრემიერ-მინისტრმა, ირაკლი კობახიძემ ოპოზიციაზე საუბრისას განაცხადა. მისი თქმით, დღევანდელი ოპოზიციის დასუსტებით, საქართველოს უჩნდება პერსპექტივა, რომ საქართველოში ჯანსაღი ოპოზიცია და ჯანსაღი დემოკრატიული სისტემა ჩამოყალიბდეს.

„ყველა ვხედავთ, რომ არა მარტო ამ პარტიაში [„ერთიანი ნაციონალური მოძრაობა“], არამედ რადიკალურ ოპოზიციაში, მძიმე ვითარებაა. არსებობს დეფიციტი, საკადრო და ინტელექტუალური შიმშილი და ამ ყველაფრის გამოხატულებაა ის საკადრო იდეები, რომლებიც ჩვენ ვიხილეთ.

ეს ძალიან კარგია იმისათვის, რომ საქართველოში პოლიტიკური სპექტრი გაჯანსაღდეს. ვიდრე ასეთი პოლიტიკური პარტიები, როგორიც არის „ერთიანი ნაციონალური მოძრაობა“ და მისი მომიჯნავე პარტიები ოპოზიციის ძირითად ბირთვს წარმოადგენენ, დემოკრატიული სისტემა ვერ ჩამოყალიბდება.

ძალიან კარგია, რომ ეს პარტიები სულ უფრო სუსტდება. ასეთ პირობებში საქართველოს უჩნდება იმის პერსპექტივა, რომ ჯანსაღი ოპოზიცია ჩამოყალიბდეს და შესაბამისად ჯანსაღი დემოკრატიული სისტემა“,- განაცხადა ირაკლი კობახიძემ.