"ეს არ იყო შორსმჭვრეტელი და ბრძნული განცხადება. ავტორი გრძელვადიან შედეგებზე არ ფიქრობდა. ამერიკის ელჩი არის სახელმწიფოს სახე და მისი ნებისმიერი სიტყვა და ქმედება განიხილება, როგორც სახელმწიფოს პოზიცია და აქ ცოტა ფრთხილად უნდა ვიყოთ"- ასე ეხმაურება პოლიტოლოგი საერთაშორისო საკითხებში კახა გოგოლაშვილი ქართულ პოლიტიკურ პროცესებში ელჩების, კერძოდ აშშ-ს ელჩისა და ევროკავშირის ელჩის როლზე ტელეკომპანია "მთავარი არხის" დირექტორის ნიკა გვარამიას მიერ გაკეთებულ განცხადებებს.
როგორც ნიკა გვარამიამ თავის საავტორო გადაცემაში აღნიშნა, აზრი არა აქვს იმ ადამიანების ფასილიტაციით მოლაპარაკებებს, რომლებიც ვერ ხედავენ ვერანაირ სხვა ვერსიას, პარლამენტში შესვლის გარდა.
"დღეს სასაცილოა და სამარცხვინო, ადამიანს ეგონოს 21-ე საუკუნეში, რომ დიპლომატია პოლიტიკაში არის გადამწყვეტი. დიპლომატია არის მე-19 საუკუნის პროდუქტი და მე-20 საუკუნეში, საბჭოთა კავშირის დაშლით, მისი მწვერვალები დაპყრობილი იქნა და დასრულდა.
"საჯარო პოლიტიკა და სახალხო პოლიტიკა არის მთავარი ტექნოლოგიური იარაღი ყველა ქვეყანაში აშშ-თი დაწყებული, ევროპულ დემოკრატიამდე დამთავრებული. ის, რომ "დიდი ძმის" აღქმა გვქონდეს ამერიკის ელჩის მიმართ, უკვე შეურაცხმყოფელია საკუთრივ იმ სახელმწიფოსი, რომლის ელჩზეც ვლაპარაკობთ. ეს არის პოსტკოლონიური კომპლექსი, სინდრომი საბჭოთა კავშირში ნაცხოვრები ადამიანის.
არასდროს არავინ არ არის აპრიორი მართალი, არც ამერიკის ელჩი, არც ამერიკის პრეზიდენტი. დიდი ბოდიში, მაგრამ ქვეყანა, სადაც ტრამპი იყო პრეზიდენტი, რომელსაც ტვიტებს უბლოკავს ამერიკული სოციალური ქსელი "ტვიტერი", რამდენიც არ უნდა ვილაპარაკოთ, ამის კრიტიკა არ შეიძლებაო, ვინმემ რომ მითხრას, დავცინებ დიდი დაცინვით.
"არგუმენტი, რომ ელჩი ასეთია და ასე ფიქრობს, ელჩის საწინააღმდეგო არგუმენტია და არა თქვენი პოზიციის. ევროპას და აშშ-ს ურტყამს ელჩების, სასმართლოების და ასე შემდეგ ცუდი, არასწორი, ანტიქართული პოზიციები.
"არ შეიძლება ფეტიშიზაცია არც ელჩის და არც არავისი საერთოდ. ამ ქვეყანაში თუ ხარ პოლიტიკოსი ფეტიში არის ერთადერთი ის, ვინც არის ხელისუფლების წყარო- ქართველი ხალხი"- ამბობს ნიკა გვარამია და იქვე დასძენს, რომ როცა ელჩების აზრით, ერთადერთი გამოსავალი არის პარლამენტში შესვლა, ამას პოზიციონერობა ჰქვია.
"კელი დეგანანი და კარლ ჰარცელი კი არინ პასუხისმგებლები ამგვარი წინასაარჩევნო გარემოს გატარების და შედეგებისთვის, ამიტომ იბრძვიან ახლა, რომ რაიმე გამოვიდეს, რადგან მათ შორის, მათი უმოქმედობა არის ამ ყველაფრის წინაპირობა" - თქვა მან.
"პირადად მე ისეთი შთბეჭდილება დამრჩა, რომ ნიკა გვარამიამ ოპოზიციის ლიდერები დასვა სტუდიაში და ლექციას უკითხავდა დიპლომატიის არსზე, მიზნებზე და იმაზე, თუ როგორ დაქვეითდა დიპლომატია. რაც სწორი არ არის და დიპლომატიას ბევრი დარჩა შესაძლებლობები და სათქმელი.
"რაც შეეხება ამ უცნაურ თავდასხმებს ელჩებზე, ეს არ იყო შორსმჭვრეტელი და ბრძნული განცხადება. როგორც ჩანს, ავტორი არ ფიქრობდა გრძელვადიან შედეგებზე. მაგრამ, გვარამიას განცხადება არის გვარამიას განცხადება და ის ქვეყანას ვერ დააზარალებს.
"გვარამია ნამდვილად ნიჭიერი ადამიანია, აქვს დიდი ამბიციაც, რადგან ხალხის სახელით ლაპარაკობს, მაგრამ ვერ ერკვევა ვერც პოლიტიკაში და ვერც დიპლომატიაში.
"იმის მაგვირად, რომ მადლიერები ვიყოთ, რადგან ქართველებმა ვერ მოახერხს ერთმანეთთან დალაპარკება და მედიატორი გვჭირდება, ეს ხალხი დროს და ენერგიას ხარჯავს და სრულიად არასწორია ელჩებზე პოლიტიკური მიკერძოების დაბრალება.
"ამერიკის ელჩი გამოხატავს ამერიკის პოზიციას და ის ვერ დაიწყებს სპონტანურ მოქმედებს. ელჩი არის სახელმწიფოს სიმბოლო იქ სადაც ჩადის, მისი ნებისმიერი სიტყვა და მოქმედება განიხილება როგორც სახელმწიფოს პოზიცია, აქ ცოტა ფრთხილად უნდა ვიყოთ"- განაცხადა "რეზონანსთან" კახა გოგოლაშვილმა.
ფილოსოფოსი ზაზა ფირალიშვილი "რეზონანსთან" აღნიშნავს, რომ აჯობებდა ზოგ ოპოზიციურ ლიდერს გარედან შეეხედა ვითარებისთვის.
"აბა, რა უნდა გითხრათ ამ განცხადებაზე? ძნელია მისი კომენტირება. პროცესი რომ სხვაგვარად წარმართულიყო და ოპოზიციურ პროტესტს საერთაშორისო მხარდაჭრა ჰქონოდა, ალბათ, სულ სხვაგვარად შეაფასებდნენ, ზოგადად პოლიტიკაში დიპლომატიის როლს და დიპლომატების როლს დღევანდელ პროცესებში.
"მე არ ვზივარ უცხოელი დიპლომატების გულში და მხოლოდ შემიძლია ვივარაუდო, რომ აფიქრებთ, ასეთი ექსტატური და არარაციონალური ბრძოლით, მითუმეტეს, სერიოზული საზოგადოებრივი მხარდაჭერის გარეშე ოპოზიცია მხოლოდ იმას თუ მიაღწევს, რომ საქართველოში ლუკაშენკოს მმართველობის რაღაც მსგავსი ჩამოყალიბდება და რომ დღევანდელ სიტუაციაში კარგად გათვლილი ნაბიჯების გარეშე კარგ შედეგს ვერ მივიღებთ. თუ დამიჯერებთ, მათ ძალიან კარგად უწყიან რა ხდება ჩვენს ხელისუფლებაშიც და ზოგადად ქართულ პოლიტიკაშიც.
"შეიძლება თქვან, ჩვენ სწორედ ლიკაშენკოს ვარიანტის წინააღმდეგ ვიბრძვითო, მაგრამ გავახსენებდი, თუ რა როლი შეასრულა ამ ოცი წლის წინანდელმა გულანთებულმა და ილუზიებსა და ფუჭ იმედებს გამოდევნებულმა ბელორუსულმა ოპოზიციამ ოცწლიანი ერთპიროვნული მმართველობის ჩამოყალიბებაში.
"მათ რიგითი ბელორუსისათვის სწორედ რომ ფსიქოლოგიურად გაამართლეს ის, რაც მოხდა. ჩვენში, მართლაც, შეიძლება ბელორუსი განმეორდეს, მაგრამ არა დღევანდელი, არამედ - ოცი წლის წინანდელი. ყველაზე ცუდი მაშინ ხდება, როდესაც სიკეთისათვის იბრძვის ის, ვინც არ იცის ბრძოლა, მითუმეტეს, თუ ამ მებრძოლთა დიდი ნაწილი თავადაც არაერთხელ იყო ეჭვმიტანილი საარჩევნო დარღვევებში.
"მოვლენების ასეთი დასასრულის ალბათობა საკმაოდ მაღალია, ვიმეორებ, ძალზე მაღალი. დიპლომატებს ისიც აწუხებს, რაც სამხრეთ კავკასიაში ხდება და იციან, რომ დღევანდელი ქაოტური და ექსტრემისტულ რიტორიკაზე აგებული ბრძოლა რუსეთისათვის მხოლოდ ხელსაყრელია. ასე ის მცირედიც კი შეიძლება დავკარგოთ, რაც გვაქვს.
"იმასაც გავიხსენებ, რომ ორიოდე დიპლომატმა მოვლენების შეფასებისას "პოლიტიკური სიმწიფე" ახსენა. მე თავადაც ვეცადე ორიოდე ოპოზიციურ ლიდერთან მესაუბრა ამ თემაზე, მაგრამ ვიგრძენი, რომ ლუდომანის აზარტით არიან ბრძოლაში ჩართულები და ვერ აღიქვამენ სიტუაციას. ტყუილად დავაბრალებთ დიპლომატებს რამეს. აჯობებდა, ზოგი ოპოზიციური ლიდერს მაინც გარედან შეეხედა ვითარებისათვის"- განაცხადა "რეზზონანსთან" ზაზა ფირალიშვილმა.
საგარეო საქმეთა ყოფილი მინისტრის ირაკლი მენაღარიშვილის შეფასებით, ამ განცხადების კომენტირება შეუძლებლია, დიპლომატიურ ენაზე ძალიან ცუდად იკითხება და ჩვენი პარტნიორების მიერ ძალიან მწავედ იქნება აღქმული.
ცნობილი ქართველი კინორეჟისორის მერაბ კოკოჩაშვილის აზრით, დიპლომატიის გარეშე ურთიერთობა ვერ მოხდება ვერც მოზობელთან და ვერც მტერთან.
"მართლაც გაბრაზებული ბავშვებივთი იქცევიან, როგორ შეიძლება ასეთი დამოკიდებულება იმ ადამიანების მიმართ, ვინც გეხმარება. ეს მოლაპრაკებაც ხომ იმ ელჩებთან ტარდება, რომლებმაც ეს სიკეთე მოიტანეს, რომ ქვეყნას ჰყავს მრავალპარტიული პარლამენტი.
"დიპლომატია ყოველთვის იყო და იქნება, დიპლომატიის გარეშე ურთიერთობა ვერ მოხდება ვერც მეზობელთან და ვერც მტერთან. საქართველო მარტო არ არის, ის უზარმაზრი ოჯახის წევრია, რომელსაც მსოფლიო ჰქვია"- განაცხადა "რეზონნსთან" მერაბ კოკოჩაშვილმა.