ჯანდაცვის სფეროს ქართველ სპეციალისტებს შორის ახალი მწვავე დაპირისპირება დაიწყო. იმ ფონზე, როდესაც მთავრობამ უკვე შეიმუშავა კორონავირუსის საწინააღმდეგო ვაქცინაციის გეგმა, რომელსაც მომავალ კვირას გამოაქვეყნებს, სპეციალისტებს შორის დავა ატყდა იმაზე, თუ მინიმუმ რა რაოდენობის ადამიანი უნდა აიცრას იმისთვის, რომ მოხდეს ე.წ. იმუნური ფენის (სხვაგვარად - ჯოგური, ან პოპულაციური იმუნიტეტის) გამომუშავება. დაავადებათა კონტროლის ეროვნული ცენტრის ხელმძღვანელის ამირან გამყრელიძის თქმით, ამისთვის მოსახლეობის მინიმუმ 60%-ის აცრაა საჭირო. ჯანდაცვის ექსპერტ გიორგი ფხაკაძის აზრით კი, ვინც მოსახლეობის 60%-ის აცრას საკმარისად თვლის, პენსიაზეა გასაშვები. რეალურად მოსახლეობის რამდენპროცენტიანი აცრაა ჩასატარებელი, რომ ქვეყანა პანდემიას დაეხსნას?