ზუგდიდში საპროტესტო აქცია გრძელდება. სეზონზე თხილის მკრეფავები შრომის ანაზღაურების მომატებას ითხოვენ. აქციის მონაწილეების განმარტებით, კილო თხილის მოგროვებასა და ჩასაბარებელ პუნქტამდე მიტანაში კომპანია “აგრი-ჯორჯია” 50 თეთრს იხდის, რასაც საპროტესტო აქცია მოჰყვა.

მუშები ამბობენ, რომ სოციალური სიდუხჭირის ფონზე ეს არის კაბალური ფასი, ისინი 20 თეთრით ანაზღაურების მომატებას ითხოვენ.

მუშები ამ წუთებში კომპანია "აგრი-ჯორჯიასთან" არიან შეკრებილები და ხელმძღვანელ პირთან შეხვედრას ცდილობენ, თუმცაღა ამ დრომდე არავინ შეხვედრია.

კომპანიაში ამბობენ, რომ მუშებისთვის ტარიფები წინასწარ იყო ცნობილი და შრომის ანაზღაურებაზე ფასების მომატება არ იგეგმება. 400-მდე მუშამ პროტესტის ნიშნად დილიდანვე უარი თქვა თხილის პლანტაციებში მუშაობაზე.

“აგრი - ჯორჯიას” ზუგდიდის სოფელ ონარიაში 500 -ჰექტარამდე მიწის ნაკვეთზე თხილის პლანტაცია აქვს გაშენებული.