ჩვეულებრივი ფაშისტები არიან, არ შეცვლილან, ისინი ხელისუფლებაში ყოფნის დროსაც იმავეს აკეთებდნენ, - ასე გამოეხმაურა მედიასთან თბილისის მერი, კახა კალაძე "იმედისა" და "პოსტ ტვ"-ის ჟურნალისტების მიმართ აგრესიას.
თბილისის მერის განმარტებით, განსხვავებული აზრის გამო, ჩაგვრა და შეურაცხყოფა, ევროპული ღირებულებებისგან შორსაა.
„ჩვეულებრივი ფაშისტები არიან. არ შეცვლილან, ხელისუფლებაშიც იმავეს აკეთებდნენ, პირდაპირ კლავდნენ, აუბედურებდნენ ოჯახებს. დღეს ამის რესურსი აღარ გააჩნიათ, თორემ ხელისუფლებაში რომ იყვნენ, იმავეს გააგრძელებდნენ, იგივე უბედურებას ჩაიდენდნენ, რასაც 9 წლის განმავლობაში აკეთებდნენ. დღეს ამის რესურსი არ აქვთ და რისი შესაძლებლობაც აქვთ, ყველაფერს აკეთებენ - ეს იქნება ფსიქოლოგიური ძალადობა, ბულინგი. ნახეთ, რა მესიჯებს სწერენ მსახიობებს, ფეხბურთელებს. ეს არის ჩვეულებრივო ძალადობა. ახალისებენ ამ ყველაფერს, რად ძალიან ცუდია", - განაცხადა კალაძემ.
თბილისის მერმა აღნიშნა, რომ ეს არის მართული პროცესი.
„იმის მაგივრად, რომ მოწოდებები იყოს, ნუ შეუშლით ხელს ჟურნალისტებს თავის საქმიანობაში, ნუ მიაყენებთ შეურაცხყოფას. მერე რა, შეიძლება ერთმანეთისგან განსხვავებული აზრი გვქონდეს, ამის გამო ცხვირ-პირი უნდა დავუმსხვრიოთ ერთმანეთს? ეს არ არის ევროპული ღირებულებები. გააკეთეთ შედარება, ძალიან მარტივია, იგივე ეს ბუღაძეები და ვიღაცები, ჩვეულებრივი მოძალადეები არიან, როდესაც ასეთ განცხადებებს აკეთებენ. იმის ნაცვლად, რომ მოუწოდონ ხელი არ შეუშალონ ჟურნალისტებს თავის საქმიანობაში, ხედავთ, რა განცხადებებს აკეთებენ ", - განაცხადა კახა კალაძემ.