ფოთში, მომსახურების სააგენტოს დაცულ ავტოსადგომაზე 43  წლის გურამ ახალაია ჩაცხრილეს.  მამაკაცს ერთი პირი ცეცხლსასროლი იარაღით პოლიციის შენობის კიბეებთან თავს დაესხა და  საკუთარ ავტომობილში რამდენიმე გასროლით ჩაცხრილა. გარდაცვლილი სააგენტოში შვილთან ერთად იყო მისული. თავდამსხმელმა, როდესაც დაინახა, რომ გოგონა ავტომობილიდან გადავიდა და შენობაში შევიდა, მარტო დარჩენილ მამაკაცს თავს დაესხა.

„ფაიზერის" ვაქცინის პირველი დოზები საქართველოში თებერვლის ბოლომდე შემოვა, ამის შეხებ განცხადება უკვე გააკეთა პრემიერ-მინისტრმა გიორგი გახარიამ. კოვაქს პლაფორმიდან მიღებული 29 250 დოზა დახლოებით 14 000 ადამიანს ეყოფა. ფაიზერის ვაქცინა, რომლისთვისაც საჭიროა ულტრადაბალ ტემპერატურაზე, მინუს 70-80 გრადუსზე, შენახვა, დასაწყობდება დაავადებათა კონტროლის ცენტრის თბილისის სასაწყობე მეურნეობაში, ასევე ქუთაისსა და ბათუმში.

ოპოზიციონერი დეპუტატებისთვის უფლებამოისლების შეწყვეტაზე უარის თქმას მმართველი პარტია ორი არგუმენტით ამყარებს. მათი განცხადებით, ბოლო კვირეების კვლევებით, საქართველოს მოსახლეობის 2/3 საპარლამენტო საქმიანობაში ოპოზიციის ჩართვას მოითხოვს. ასევე, საერთაშორისო პარტნიორების მოწოდებები, რომ ხელისუფლებამაც და ოპოზიამაც თავი უნდა შეიკავონ "ნებისმიერი კარის ნაადრევად დახურვისგან".

ყაჩაღობა და დაკავების ოპერაცია თბილისში - ჩიტაიას ქუჩაზე, სუპერმარკეტების ქსელ "სპარის" ერთ-ერთ ფილიალში, შეიარაღებული პირები შეიჭრნენ. არსებული ინფორმაციით, ორი არასრუწლოვანი სანადირო თოფით და დანით ობიექტის დაყაჩაღებას ცდილობდნენ. თვითმხილველები „რეზონანსთან“ ყვებიან, რომ შემთხვევა დილის 7 საათზე მოხდა. 

მიუხედავად იმისა, რომ ქვეყანა ჩაკეტილია და კომენდატის საათი მოქმედებს, 2020 წელს საქართველოში 4 999 ავტოავარია მოხდა და მათში საერთო ჯამში 450 ადამიანი დაიღუპა. ეს იმ პირობებში, როდესაც რამდენიმე თვის განმავლობაში კომენდანტის საათი მოქმედებდა და გარკვეულ პერიოდში საშვის გარეშე ავტომობილით გადაადგილება დღის განმავლობაშიც აკრძალულიც იყო. შსს-ს მიერ 2 თებერვალს გამოქვეყნებულ ამ მონაცემებს სპეციალისტები კატასტროფულს უწოდებენ.

სისხლიანი გარჩევა სენაკის მუნიციპალიტეტის სოფელ ახალსოფელში - 57 წლის ზურაბ ნარუაშვილმა თანასოფლელები და საკუთარი ძმა დაჭრა, რომელიც მის გაშველებას ცდილობდა.

მშენებლობაზე დაღუპული კიდევ ერთი მუშა - 29 იანვარს ბათუმში, ანგისის დასახლებაში, ბავშვთა საავადმყოფოსთან მდებარე მშენებლობიდან, მე-11 სართულის სახურავიდან 34 წლის მამუკა ბერიძე გადმოვარდა. ფაქტს ბევრი თვითმხილველი ჰყავს, რადგანაც შემთხვევა შუადღის 1-ელ საათზე მოხდა და გარშემო ხალხმრავლობა იყო.  ადგილობრივებისთვის უცნობია, იყო თუ არა უსაფრთხოების ნორმები დაცული და რა გახდა რეალურად მუშის გარდაცვალების მიზეზი. თვითმხილველები აცხადებენ, რომ გზის მხარეს სამშენებლო კომპანიას დამცავი ბადე აქვს, თუმცა შენობის უკანა მხარეს, საიდანაც მუშა გადმოვარდა, დამცავი ბადე არ არის. 

ვანის ავტოსადგურზე ტაქსის მძღოლებს შორის დაპირისპირება დაჭრით დასრულდა – სროლას წინ სიტყვიერი და ფიზიკური შეურაცხყოფა უძღოდა. როგორც თვითმხილველები „რეზონანსს“ უყვებიან, სავარაუდოდ,  სისხლიანი გარჩევის მიზეზი ტაქსის მძღოლებს შორის კლიენტის ვერ გაყოფა გახდა – 30 წლის ბიჭმა  50 წლის კაცი ფეხში სანადირო თოფით დაჭრა. მათი თქმით, დაჭრილ მამაკაცს იცნობენ, ხოლო ბრალდებულს - არა.

კარტოგრაფ ივერი მელაშვილისა და „ევროპული საქართველოს" წევრის აკაკი ბობოხიძის მიერ „ტვ პირველის" ეთერში გაკეთებულმა განცხადებებმა სოციალურ ქსელში დიდი აურზაური გამოიწვია, ნაწილმა მათ მოღალატეებიც კი უწოდა, კონფლიქტოლოგი და ყოფილი სახელმწიფო მინისტრი პაატა ზაქარეიშვილი „რეზონანსთან" საუბარში მიიჩნევს, რომ ეს საკითხი არა მოქალაქეების, არამედ სახელწიფო დონეზე უნდა გადაწყდეს.

კოვიდშეზღუდვებთან დაკავშირებით ხელისუფლებამ შეიძლება მიდგომები შეცვალოს, იმ შემთხვევაში თუ დადებითი მაჩვენებელი ქვეყნის მასშტაბით 4%-ს ჩამოსცდება. როგორც მთავრობაში აცხადებენ, უახლოეს ერთ კვირაში მუნიციპალური ტრანსპორტის გახსნისა და ეკონომიკის სხვადასხვა დარგის გახსნაზე მსჯელობა დაიწყება.

რუსი ჯარისკაცის ჩვენებაზე იქნება დამოკიდებული ცხინვალის იზოლატორში უკანონო ტყვეობაში მყოფი ზაზა გახელაძის ბედი. გახელაძის საქმეზე ცხინვალში ე.წ. სასამართლოს სხდომა დასრულდა. საოკუპაციო რეჟიმი გადაწყვეტილებას 5 თებერვალს გამოაცხადებს. ხუთშაბათს ჩვენება უნდა მიეცა ერთ-ერთ ჯარისკაცს, რომლის სიცოცხლის ხელყოფის მცდელობაშიც ზაზა გახელაძეს ადანაშაულებენ.

ოთხშაბათს დილის 10 ახალგაზრდა ქალი ახალქალაქის ყოფილი N1 სამხედრო ქალაქის ხიდიდან გადახტა. ადგილობრივები „რეზონანსთან“ ყვებიან, რომ შუახნის ქალი ხიდზე ჯერ ჩამოჯდა, შემდეგ მოულოდნელად წამოდგა და წყლის მილზე შედგა, საიდანაც გადახტა. მათი თქმით, ყველაფერი იმდენად სწრაფად მოხდა, რომ რეაგირება ვერ მოასწრეს. სასწრაფო დახმარება და პოლიცია გამოიძახეს, მედიკოსებს  კი ქალი უკვე გარდაცვლილი დახვდათ.