უნგრეთი ევროკავშირის ფარგლებში უკრაინისთვის 90 მილიარდი დოლარის გამოყოფას კვლავ ბლოკავს და ამის წინაპირობად ისევ „დრუჟბას" ამუშავებას ასახელებს. ევრობლოკი აცხადებს, რომ გეგმა „ბ" და ვეტოს დასაძლევად ინსტრუმენტები აქვს, თუმცა არ აკონკრეტებს რა სახის მექანიზმია უკრაინის დახმარების გამოყოფისთვის.

ოპოზიციაში აცხადებენ, რომ „დიდი შერიგებისკენ" ნაბიჯი ხელისუფლებამ უნდა გადადგას, გარკვეულ კომპრომისებზე წავიდეს, რათა ქვეყანაში სიტუაცია განიმუხტოს და რეალური დიალოგის დაწყებისთვის შესაბამისი გარემო შექმნას. ეს იქნებოდა პატრიარქის ანდერძის „სწორად გააზრება", სადაც ურთერთმიტევებასა და შერიგებაზეა აქცენტი.

ახლო აღმოსავლეთში კვლავ რთული ვითარებაა. ისარელმა ირანის დედაქალაქ თეირანში საჰაერო დარტყმების ახალი ტალღა დაიწყო და ომის გაგრძელება დაანონსა. სავარაუდოდ, ლიკვიდირებულია ირანის ისლამური რევოლუციის გუშაგთა კორპუსის პრესსპიკერი. ირანის ახალი უზენაესი ლიდერი აიათოლა მოჯტაბა ხამენეი, პრეზიდენტისთვის გაგზავნილ წერილში აცხადებს, რომ „ქვეყნის მტრებს უსაფრთხოება არ უნდა ჰქონდეთ". არაბთა გაერთიანებული საამიროების, ქუვეითის, საუდის არაბეთისა და ბაჰრეინის ტერიტორიებზე კი სარაკეტო და დრონებით თავდასხმები გრძელდება.

სამების საკათედრო ტაძართან ხალხის უწყვეტ ნაკადს ბოლო არ უჩანს - მოქალაქეები საათობით ელოდებიან, რათა უკანასკნელი პატივი მიაგონ კათოლიკოს-პატრიარქს, რომლის დაკრძალვა კვირას, 22 მარტს გაიმართება.

კათალიკოს-პატრიარქის გარდაცვალებას საქართველოს მსოფლიო ლიდერები უსამძიმრებენ. მის წვლილზე საუბრობენ და საქართველოს საელჩოებში გახსნილ სამძიმრის წიგნში ჩანაწერებს აკეთებენ. დაკრძალვის მსახურებაზე კი მსოფლიო პატრიარქი ბართლომეოსი, კავკასიის მუსლიმთა საბჭოს თავმჯდომარე, შეიხ-ულ-ისლამ ალაჰშუქურ ფაშაზადე და ვატიკანიდან დელეგაცია თბილისში ჩამოვლენ.

საერთაშორისო ბაზარზე, ნავთობის ფასი მკვეთრად გაიზარდა, სამაგიეროდ ოქრო გაიაფდა. მართალია, ეს მხოლოდ ორი დღის შედეგია, თუმცა მას შემდეგ, რაც ირანსა და ახლო აღმოსავლეთში საომარი მოქმედებები დაიწყო, სხვა მოცემულობა გამოიკვეთა. ფინასისტები ამას ბირჟის ტენდენციებით ხსნიან და ამბობენ, რომ ვინაიდან ირანსა და ახლო აღმოსავლეთში ომია და ჰორმუზის სრუტეს მთლიანად ირანი აკონტროლებს, ინვესტორებისთვის ეს ერთგვარი სიგნალია, კაპიტალი გაძვირებულ ნავთობში დააბანდონ. სწორედ ამით აიხსნება უცნაური ტენდენცია, როდესაც ნავთობი მკვეთრად ძვირდება, ხოლო ოქრო იაფდება. 

საქართველოს კათოლიკოს-პატრიარქის, ილია II-ის დაკრძალვასა და სხვა პროცედურებთან დაკავშირებული წმინდა სინოდის განჩინება ურთიერთმიტევებასა და შერიგებაზე აკეთებს აქცენტს, რაც პრაქტიულად პირდაპირ ეხმიანება პოლარიზებულ პოლიტიკურ გარემოს და მხარეებს შორის დიალოგის საჭიროებას. მით უმეტეს იმ ფონზე, როცა ბოლო დროს ამ საკითხზე მხარეებმა უკვე ღიად დაიწყეს საუბარი, თუმცაღა შეხების წერტილები ჯერჯერობით ვერ მოძებნეს.

სახელმწიფო დეპარტამენტმა საქართველო „ვიზის დეპოზიტის" პროგრამაში დაამატა, რაც იმას ნიშნავს, რომ 2 აპრილიდან საქართველოს მოქალაქეებმა აშშ-ს „ბი1"/„ბი2" ტურისტული, ბიზნეს, ან მკურნალობისთვის ვიზის მისაღებად განაცხადის გაკეთებისას, ხაზინის სპეციალურ ანგარიშზე დეპოზიტი უნდა შეიტანონ, რომელიც, კატეგორიების მიხედვით, 5-დან 15 ათას დოლარამდეა. სავიზო რეჟიმის დარღვევის შემთხვევაში, თანხა უკან არ ბრუნდება.

ირანს უკვე არაბული სახელმწიფოებიც ემუქრებიან და მის წინააღმდეგ საბრძოლო მოქმედებების დაწყებას არ გამორიცხავენ. ამ მხრივ განსაკუთრებით მკაცრი განცხადებები კეთდება კატარსა და საუდის არაბეთში. მეორეს მხრივ, ირანს აშშ-ის პრეზიდენტი დონალდ ტრამპიც აფრთხილებს საპსაუხო მოქმედებების შესახებ. ირანი კი, მედიის ინფორმაციით, რეგიონში არსებულ ქვეყნებს გამოფხიზლებისკენ მოუწოდებს.

მოსკოვში საქართველოსთან ურთიერთობის აღდგენაზე მორიგი განცხადება გაკეთდა, ოღონდ ამჯერად განსხვავებული, ორიგინალური ფორმულირებით. რუსეთის საგარეო საქმეთა სამინისტროს პრესსპიკერმა მარია ზახაროვამ განაცხადა, რომ მოსკოვსა და თბილისს შორის ურთიერთობების აღდგენა საქართველოს ნაბიჯებზეა დამოკიდებული. ხოლო მოსკოვში ამას ისე ელოდებიან, როგორც საინტერესო და სახალისო სპორტულ თამაშს.

სრულიად საქართველოს კათოლიკოს-პატრიარქს, ილია მეორეს სოხუმსა და ცხინვალშიც გლოვობენ, თუმცა მისი ფიგურის მიმართ გარკვეული კრიტიკა შეინიშნება. ზოგიერთი ამბობობს, რომ პატრიარქ ილიას შეეძლო ქართულ-აფხაზურ ურთიერთობებში უკეთესი როლი ეთამაშა, სხვები კი მართმადიდებელ მრევლს გულწრფელად უსამძიმრებენ.

ნავთობის ფასი არანორმალური ნიშნულისკენ მიიწევს. ირან-ისრაელ-ამერიკის სამხედრო დაპირისპირების დაწყებიდან დღემდე 1 ტონა ბენზინი - 300 დოლარით, ხოლო დიზელი 430 დოლარით გაძვირდა, რაც თითქმის 40%-იანი სხვაობაა. ნეგატიური  დინამიკა გაგრძელდება, თუმცა რა მაჩვენებელს მიაღწევს საწვავის ფასი, პროგნოზის გაკეთება ყველას უჭირს. სავარაუდოა, რომ უახლოეს დღეებში ბენზინის და დიზელი 10-20 თეთრით კიდევ გაძვირდება.