საქართველოს ფეხბურთის ფედერაციის პრეზიდენტი ლევან კობიაშვილი საქართველოს ეროვნული საფეხბურთო ნაკრების ყოფილი ნახევარმცველის გიორგი ნემსაძის გარდაცვალებას სოციალურ ქსელში ეხმაურება.
"გიო, ძალიან ემოციური და მძიმეა შენზე წარსულში საუბარი. შენი ნაადრევი წასვლა უდიდესი დანაკლისია ჩემთვის, როგორც შენი ყოფილი თანაგუნდელისთვის, და მთელი საქართველოსთვის.
დაუვიწყარ მოგონებად დარჩება ნაკრებში ერთად გატარებული თითოეული წუთი და ის საფეხბურთო ემოციები, რომლებიც არასოდეს წაიშლება მეხსიერებიდან.
ყოველთვის გამორჩეული იყავი, როგორც თანაგუნდელი, როგორც კაპიტანი და როგორც ადამიანი მოედნის მიღმა. შენი ლიდერობა და ადამიანური თვისებები ყველას მეხსიერებაში სამუდამოდ დარჩება.
ვუსამძიმრებ გიორგის ოჯახს, ახლობლებსა და ყველა გულშემატკივარს, რომელიც მისი თამაშითა და ადამიანობით ამაყობდა.
გიო, შენი განვლილი გზა და ჩვენთან ერთად შექმნილი მოგონებები სამუდამოდ დარჩება ჩვენს გულებში და ქართული ფეხბურთის ისტორიაში", - დაწერა ლევან კობიაშვილმა.