მერაბ დვალიშვილი შონ ომალის წინააღმდეგ - ბრძოლა, რომელიც UFC 316-ზე მთავარი მოვლენაა და უამრავი გულშემატკივარი ელოდება.

ბუკმეიკერების აზრით, ფავორიტი ქართველია და საინტერესოა, რა თანხას გამოიმუშავებს იგი, თუ თავის წონაში ერთ-ერთი უძლიერესი მებრძოლის კიდევ ერთხელ დამარცხებას შეძლებს. თავის მხრივ, ომალი, დვალიშვილთან სექტემბერში მარცხის გამო, დაკარგული ქამრისა და საჩემპიონო წოდების დაბრუნებას შეეცდება.

The Sports Rush-ის ინფორმაციით, ბრძოლის მნიშვნელობის, მასშტაბისა და ინტრიგის გათვალისწინებით, არის შანსი, დვალიშვილის კარიერაში პირველად მოხდეს, გამარჯვებისთვის 1 მლნ აშშ დოლარზე მეტი მიიღოს.

როგორც ამერიკული გამოცემა წერს, თუკი მოიგებს, მერაბის შემოსავალი მინიმუმ 750 ათასი აშშ დოლარი იქნება და არც ის იქნება სიურპრიზი, თუ ეს თანხა 1 მლნ დოლარს გადააჭარბებს.

მაგალითად, ომალისთან სექტემბერში გამარჯვებისთვის ქართველს 700 ათას დოლარზე მეტი ერგო, იანვარში უმარ ნურმაგომედოვთან ქამრის დაცვისთვის კი - 500 ათასი დოლარი.

შედარებისთვის აღვნიშნოთ, რომ სექტემბერში დვალიშვილთან წაგებულ ბრძოლაში შონ ომალის 2.5 მლნ აშშ დოლარი გადაუხადეს - ცხადია, გამარჯვების შემთხვევაში, მეტს მიიღებდა.

შეგახსენებთ, კვირას, 8 ივნისს, თბილისის დროით გამთენიისას, დვალიშვილი ომალისთან შეეცდება, სწორედ მისი სექტემბერში დამარცხებით მოპოვებული, საჩემპიონო ქამარი დაიცვას და დაუმარცხებლის სტატუსი გაიმყაროს.