გუშინდელი განცხადება ნატო-ს წევრი ქვეყნების პოზიტიურ დამოკიდებულებაზე მიუთითებს. ნატო-ს თავისი სტრატეგიული ინტერესები გააჩნია და დღესდღეობით ეს სტრატეგიული ინტერესები მნიშვნელოვანწილად არის გამოხატული იმ საომარ დაპირისპირებაში, რომელიც ევროპაში მიმდინარეობს, და არა მხოლოდ ევროპაში, არამედ ახლო აღმოსავლეთშიც, - ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.
ვოლსკის თქმით, მნიშვნელოვანია, რომ ნებისმიერი გადადგმული ნაბიჯი უზრუნველყოფდეს საქართველოს უსაფრთხოებას, სტაბილურობას და აგრესიული რუსეთის მოქმედებების განსაპირობებლად წითელი ნაჭერი არ იყოს აფრიალებული. „ჩვენთვის ნატო-თან ურთიერთობას საგანგებო მნიშვნელობა აქვს და არაერთხელ დავამტკიცეთ, რომ ყველაზე, მათ შორის წევრ ქვეყნებზე მეტი რესურსი გაგვაჩნია, რათა ერთად ვიზრუნოთ საერთაშორისო უსაფრთხოებაზე. საქართველოს უსაფრთხოებისთვის ნატო-ს წევრობა მნიშვნელოვანია, მაგრამ ამ საკითხის ცალსახად განხილვა ასე ადვილი არ არის, თუმცა იმედი გვაქვს, მომავალში დიდი ძალები გარკვეულ პრინციპებზე შეთანხმდებიან, რაც მსოფლიოში უსაფრთხოებას გულისხმობს. ჩვენთვის ნატო-სთან ურთიერთობის ფორმა არის მნიშვნელოვანი, რომელზეც არასოდეს უარი არ გვითქვამს. ჩვენ ჩვენი კონსტიტუციით განსაზღვრულ საგარეო მიმართულებას არ ვცვლით", - განაცხადა ვოლსკიმ.
ნატო-ს სამეკავშირეო ოფისმა გაავრცელა განცხადება, რომელშიც ნათქვამია, რომ „ნატო მტკიცედ უჭერს მხარს ბუქარესტის და შემდგომი სამიტების გადაწყვეტილებებს, რომ საქართველო გახდება ალიანსის წევრი".