თორნიკე შენგელია ბოლონიას იტალიის ჩემპიონობით ემშვიდობება. მან ფინალური სერიის მესამე მატჩში 31 ქულა ჩააგდო და „ვირტუსს“ „ბრეშასთან“ 91:74 მოაგებინა. სერია სამ მოგებამდე იყო, ბოლონიელებმა კი 3:0 გაიმარჯვეს.

თორნიკემ 29 წუთში 31 ქულა, 9 მოხსნა და 5 შედეგიანი გადაცემა მიითვალა. მის ანგარიშზე 8-დან 7 ორქულიანი, 4-დან 4 სამიანი და 5-დან 5 საჯარიმოა. მარგი ქმედების კოეფიციენტი კი დაუჯერელად მაღალი ჰქონდა – 46.

ბრენდონ ტეილორი „ვირტუსს“ 19 ქულით შეეშველა, ხოლო ბრეშადან ჯეისონ ბარნელი გამოირჩა – 24 ქულა.

შეგახსენებთ, რომ 2020 წელს თორნიკე შენგელიამ „ბასკონიას“ მაისურით ფინალში „ბარსელონა“ დაამარცხა და ესპანეთიდან ჩემპიონის ტიტულით წავიდა. ამჯერად კი იტალიის ჩემპიონის ტიტულით ტოვებს აპენინის ნახევარკუნძულს. იგი კარიერას ისევ ესპანეთში, ამჯერად „ბარსელონაში“ განაგრძობს.