კრემლში აცხადებენ, რომ აშშ უკრაინაში იარაღისა და საბრძოლო მასალის მიწოდებას განაგრძობს.

„ბევრი სიტყვა ითქვა ( „პატრიოტის“ ტიპის სისტემების) მაღალ ფასზე და ა.შ. ახლა ისე გამოდის, რომ მიწოდების ფასებს ევროპა გადაიხდის. რაღაცას გადაიხდის, რაღაცას – არა, მაგრამ ფაქტი ისაა, რომ ამერიკა იარაღს და სამხედრო ტექნიკას უკრაინას აწოდებდა და ახლაც აწვდის“, – აღნიშნა კრემლის პრესსპიკერმა, დიმიტრი პესკოვმა ჟურნალისტებთან საუბრისას.

რაც შეეხება აშშ-ის პრეზიდენტის წარმომადგენელის, კიტ კელოგის უკრაინაში ვიზიტს, პესკოვმა აღნიშნა: „ჩვენთვის ძალიან მნიშვნელოვანია, რომ ბატონი კელოგი, როგორც ტრამპის წარმომადგენელი, განაგრძობს შუამავლობის მცდელობებს რუსულ-უკრაინული მოლაპარაკების ფარგლებში“.

ამასთან, კრემლის სპიკერმა განაცხადა, რომ კიევი არ ჩქარობს მოლაპარაკებების მესამე რაუნდის ჩატარებას.

„ჩვენ კვლავ ველოდებით წინადადებებს დროის შესახებ. რუსული მხარე მზადაა, განაგრძოს და ჩაატაროს მესამე რაუნდი“, – აღნიშნა პესკოვმა.

ცნობისთვის, აშშ-ის პრეზიდენტმა, დონალდ ტრამპმა არ დააკონკრეტა, Patriot-ის რამდენ სისტემას გადასცემს უკრაინას, თუმცა განაცხადა, რომ შეერთებულ შტატებს მათ ღირებულებას ევროკავშირი აუნაზღაურებს.