ბათუმის საქალაქო სასამართლოში ჟურნალისტ მზია ამაღლობელის სასამართლო სხდომა მიმდინარეობს. ამაღლობელი  საკუთარ სისხლის სამართლის საქმეზე საბოლოო სიტყვას წარმოთქვამს. მისი თქმით, საპრცესო შეთანხმება სიკვდილივითაა. 

"იქ, სადაც 7 თვეა ვიმყოფები, საპროცესო შეთანხმება „გამოსავალია“. ჩემს საკანში ისმის ბავშვის ხმა - დედა მენატრები. როცა გავიგე, რომ მისი ოჯახი საპროცესო შეთანხმებაზე საუბრობდნენ გამიხარდა.

ჩემთვის პირიქითაა. შემოთავაზებაც კი სიკვდილივითაა. ადვოკატებმა უკვე თქვეს, რომ არა და ვერ მოვაწერ ხელს - იმ მარტივი მიზეზის გამო, რომ რაც მოხდა, არ იყო თავდასხმა და სილის გაწვნის თავდასხმად წარმოჩენა და შეფუთვა ბოროტებაა. 7 თვეა ამაზე ვფიქრობ.

ჩემი დაკავების პირველივე დღიდან ამ სასამართლო სხდომათა დარბაზში მკაფიოდ დამიფიქსირებია და ახლაც ვიმეორებ - პასუხისმგებლობას არ გავურბივარ, განსხვავებით დგებუაძისგან. მგონია, რომ კანონში წერია „სილის გაწვნის“ ადეკვატური მუხლი.

მახსოვს, პროკურორმა სხდომაზე კითხვა დამისვა - ჩვენს კვალიფიკაციას თუ არ ეთანხმებიო, რომელი მუხლი შეგეფერებაო. ეს საქმე ამ დრომდე მოიტანა გამოძიებამ ჩემი აზრი არ უკითხავთ - მიუკერძოებლად რომ ჩაეტარებინათ გამოძიება და დგებუაძის ინტერესები არ გაეტარებინათ, ეს საქმე სასამართლოში ასე არ შემოვიდოდა. „სისხლით დავიჭერო“ საჯაროდ მომცა 4-დან 7 წლამდე - პროკურატურაც მის სამსახურში ჩადგა.

ახლა სასამართლომ უნდა იმსჯელოს იმაზე, რა სასჯელი მელის" - თქვა მზია ამაღლობელმა სასამართლოზე დასკვნითი სიტყვის წარმოთქმისას.