აშშ-ის პრეზიდენტის, დონალდ ტრამპის Air Force One-ის თვითმფრინავი ანკორიჯში დაეშვა, სადაც მისი უახლოესი მოკავშირეები, მათ შორის სახელმწიფო მდივანი მარკო რუბიო, თეთრი სახლის სპეციალური წარმომადგენელი სტივ ვიტკოფი და ცენტრალური სადაზვერვო სააგენტოს დირექტორი ჯონ რეტკლიფი შეუერთდებიან რუსეთ-უკრაინის კონფლიქტში მშვიდობის დამყარების მცდელობისას. ინფორმაციას BBC ავრცელებს.

მედიის ცნობით, ტრამპი, სავარაუდოდ, რუსეთის პრეზიდენტ ვლადიმერ პუტინს ელმენდორფ-რიჩარდსონის საჰაერო ძალების ბაზაზე ადგილობრივი დროით დილის 11:30 საათზე (19:30 GMT/20:30 BST) შეხვდება. ეს იქნება ორ ლიდერს შორის პირველი პირისპირ შეხვედრა მას შემდეგ, რაც ტრამპი თეთრ სახლში მეორე ვადით დაბრუნდა.

პუტინის ჩასვლამდე ანკორიჯში რუსეთის დელეგაცია ჩავიდა, თვითონ პუტინი კი მაგადანში შეხვედრებს მართავდა. ზოგიერთი მედიის ცნობით, პუტინი გზაშია და ანკორიჯში მალე ჩავა.