თბილისის ისტორიულ ნაწილში ავარიული შენობა-ნაგებობების ჩანაცვლების პროგრამასთან დაკავშირებით, რომელიც 2026 წლიდან დაიწყება, დღეს დედაქალაქის მერმა კახა კალაძემ ჟურნალისტებთან საუბრისას განმარტა, რომ თუ იქნება მოსახლეობის თანხმობა, შენობა-ნაგებობების გამოსყიდვა განხორციელდება.
ამასთან, თბილისის მერმა განაცხადა, რომ ეს შენობა-ნაგებობები გარემონტდება და გასაყიდად აუქციონზე გამოვა, რათა ახალმა მესაკუთრემ სათანადოდ მოუაროს ქალაქის ისტორიულ მემკვიდრეობას.
„შენობა-ნაგებობებს გამოვისყიდით, თუ იქნება მოსახლეობის თანხმობა, გავალამაზებთ, შევინარჩუნებთ და გამოვიტანთ აუქციონზე, გავყიდით, რომ შემდეგ მოუაროს იმ მფლობელმა, ვის საკუთრებაშიც იქნება“, - განაცხადა კახა კალაძემ.
მისი თქმით, დაინტერესების შემთხვევაში, აუქციონში ნებისმიერ მოქალაქეს შეუძლია მონაწილეობის მიღება.