ბრიუსელის აეროპორტმა, კიბერთავდასხმის შედეგად შექმნილი პრობლემების გამო, ავიაკომპანიებს დღეს დაგეგმილი რეისების ნახევრის გაუქმება მოსთხოვა, - ინფორმაციას Reuters-ი ავრცელებს. 

რეგისტრაციისა და ჩასხდომის სისტემების პროვაიდერმა Collins Aerospace-მა, რომელზედაც კიბერშეტევა განხორციელდა, დღეს განცხადება გაავრცელა, რომელშიც აღნიშნულია, რომ მუშაობს დაზარალებულ აეროპორტებთან და სრული ფუნქციონირების აღსადგენად საჭირო განახლებების დასრულების საბოლოო ეტაპზეა.

ბრიუსელის აეროპორტის წარმომადგენელის მტკიცებით, Collins Aerospace-ს ჯერ არ მიუწოდებია სრული ფუნქციონირების აღსადგენად საჭირო პროგრამული უზრუნველყოფის უსაფრთხო, განახლებული ვერსია, რის გამოც აეროპორტმა ორშაბათს რეისების გაუქმება მოითხოვა.

აღსანიშნავია, რომ ბრიუსელის აეროპორტმა კვირას დაგეგმილი 257 რეისიდან 50 გააუქმა, შაბათს კი - 234 გამავალი რეისიდან 25. ბერლინ-ბრანდენბურგის აეროპორტმა კვირას განაცხადა, რომ გარკვეული პრობლემები კვლავ არსებობდა. ჰითროუს აეროპორტმა კვირას დილით განაცხადა, რომ რეგისტრაციის სისტემის შეფერხების შემდეგ სამუშაოების აღდგენა გრძელდება და რომ „რეისების დიდი უმრავლესობა სრულდება". ავიაციის მონაცემთა პროვაიდერის, Cirium-ის ანალიზის თანახმად, ჰითროუს აეროპორტში შეფერხებების მაჩვენებელი დაბალი იყო, ბერლინში - ზომიერი, ხოლო ბრიუსელში მნიშვნელოვანი შეფერხებები არსებობდა.

ცნობისთვის, პარასკევს, ჰაკერებმა RTX-ის (RTX.N) საკუთრებაში არსებული რეგისტრაციისა და ჩასხდომის სისტემების პროვაიდერი Collins Aerospace-ზე თავდასხმა განახორციელეს, რამაც ლონდონის ჰითროუს, ბერლინის აეროპორტსა და ბრიუსელის აეროპორტში ოპერაციები შეაფერხა.

ანალიტიკოსი გია აბაშიძე ფიქრობს, რომ აღნიშნული კიბერშეტევების უკან რუსეთი დგას. როგორც მან აღნიშნა, პუტინი ცდილობს დასავლეთი დაარწმუნოს, რომ ძლიერი აქტორია.

„ნამდვილად ე.წ. კეთილშობილი ახალგაზრდები რა თქმა უნდა, ამის მიღმა არ არიან. რასაკვირველია, რუსეთი ცდილობს, რომ ყოველმხრივ დააბულინგოს და დატესტოს ნატოს წევრების ქვეყნების ამა თუ იმ პოტენციალის შეკრება. რაზე ვლაპარაკობთ, როცა ესტონეთში, ლატვიაში, ლიეტუვაში იჭრებიან ე.წ. ვითომ დამოუკიდებელი აქტორები და ამ დროს ეს ხდება. პოლონეთსა და რუმინეთზე რა უნდა ვთქვათ?

პუტინი ცდილობს, რომ დასავლეთს ანახოს, მედეგარი აქტორია. სამწუხარო რეალობაა, ვიღაცას მოსწონს, ვიღაცას არ მოსწონს, მაგრამ ფაქტია, ამ აგრესორ რუსეთთან დასალაპარაკებელი კიდევ ბევრია",- განაცხადა გია აბაშიძემ „რეზონანსთან".