აშშ-ის პრეზიდენტის, დონალდ ტრამპის განცხადებით, მის წინააღმდეგ გამართული დემონსტრაციები „არა მეფეებს“ (No Kings) მილიარდერი ფილანთროპის, ჯორჯ სოროსის და „სხვა რადიკალი მემარცხენე გიჟების“ მიერ არის დაფინანსებული.

„შევხედე ამ ხალხს - ისინი არ წარმოადგენენ ამ ქვეყანას. დემონსტრაციები იყო ძალიან პატარა, ძალიან არაეფექტური და ხალხი შეშლილი იყო“, - განაცხადა მან.

ტრამპმა ასევე უარყო ავტორიტარიზმის ბრალდებები და განაცხადა რომ მეფე არ არის.

„მე მეფე არ ვარ. თავს ვიკლავ, რათა ჩვენი ქვეყანა გავაუმჯობესო. სულ ეს არის. საერთოდ არ ვარ მეფე“, - განუცხადა მან ჟურნალისტებს.

შაბათს აშშ-ის მასშტაბით მილიონობით დემონსტრანტი შეიკრიბა ტრამპისა და მისი ადმინისტრაციის წინააღმდეგ პროტესტის გამოსახატავად. ბევრი მათგანი ქუჩაში გამოსვლის მიზეზად დემოკრატიის, სიტყვის თავისუფლებისა და გარემოსთვის შექმნილ საფრთხეებს ასახელებდა. ერთ-ერთი ორგანიზატორის, ამერიკის სამოქალაქო თავისუფლებათა კავშირის (ACLU) ინფორმაციით, 50-ვე შტატში გამართულ 2 500-ზე მეტ აქციაზე 7 მილიონი ადამიანი გავიდა.