საქართველოს პროკურატურამ განსაკუთრებით დიდი ოდენობით ნარკოტიკული საშუალების უკანონო შეძენის, შენახვის და რეალიზაციის ხელშეწყობის ფაქტებზე, ერთ პირს ბრალდება წარუდგინა. ინფორმაციას პროკურატურა ავრცელებს.

შინაგან საქმეთა სამინისტროს მიერ ჩატარებული გამოძიებით დადგინდა, რომ ბრალდებულმა უკანონოდ შეიძინა და ინახავდა განსაკუთრებით დიდი ოდენობით, 46,9353 გრ. ნარკოტიკულ საშუალება „ალფა პვპ“-ს. ბრალდებულმა ნარკოტიკული საშუალება უკანონო რეალიზაციის ხელშეწყობის მიზნით დააფასოვა 102 ცალად, საიდანაც 96 ცალად დაფასოებულს ინახავდა ბათუმში თავის დროებით საცხოვრებელ სახლში. ერთ ცალად დაფასოებულს ინახავდა პირადად, ხოლო ხუთ ცალად დაფასოებული ნარკოტიკული საშუალება „ალფა-პვპ“ ბათუმში საჯაროდ ხელმისაწვდომ ადგილას ფარულად განათავსა.

დაკავებულს ბრალდება საქართველოს სისხლის სამართლის კოდექსის 260-ე მუხლის მე-3 ნაწილის „ა“ ქვეპუნქტით (განსაკუთრებით დიდი ოდენობით ნარკოტიკული საშუალების უკანონო შეძენა და შენახვა) და 260 კვარტა მუხლის მე-6 ნაწილის „ა“ ქვეპუნქტით (განსაკუთრებით დიდი ოდენობით ნარკოტიკული საშუალების უკანონო რეალიზაციის ხელშეწყობა) წარედგინა, რაც სასჯელის სახედ და ზომად 20 წლამდე ან უვადო თავისუფლების აღკვეთას ითვალისწინებს.

პროკურატურის შუამდგომლობის საფუძველზე ბრალდებულს აღკვეთის ღონისძიების სახით პატიმრობა შეეფარდა.