საქართველოში UFC-ის მსოფლიო ჩემპიონატის ჩატარება შერეული ორთაბრძოლების ყველაზე გავლენიანი ორგანიზაციის პრეზიდენტმა თავად დააანონსა. დანა უაითი ამბობს, რომ უკვე მიმდინარეობს კონსულტაციები ქართულ მხარესთან.

UFC-ის პრეზიდენტის ინფორმაციას ადასტურებს საქართველოს სპორტის მინისტრიც. შალვა გოგოლაძის თქმით, ქართულმა მხარემ UFC-ის ხელმძღვანელობას უკვე მიაწოდა კონკრეტული ინფორმაცია საქართველოში არსებული ტექნიკური შესაძლებლობების შესახებ და დაუდასტურა მზაობა, რომ UFC-ის მომდევნო ჩემპიონატის მასპინძლად სწორედ საქართველოს დედაქალაქი შეირჩეს.

შეთანხმება მიღწეულია, ახლა თბილისში საბოლოო გადაწყვეტილებას ელოდებიან. საბრძოლო ხელოვნების საერთაშორისო ფედერაციაში აცხადებენ, რომ UFC-ის მსოფლიო ჩემპიონატის საქართველოში ჩატარება ქვეყნისთვის მნიშვნელოვანი იქნება, განსაკუთრებით იმ ფონზე, როდესაც ქვეყანას UFC-ის ორი მოქმედი ჩემპიონი ჰყავს - მერაბ დვალიშვილი და ილია თოფურია.

დროის ათვლა დაწყებულია. თბილისში იმედოვნებენ, რომ ქართველი სპორტის მოყვარულები ამჯერად UFC-ის ქართველ და უცხოელ ჩემპიონებს საკუთარ სამშობლოში იხილავენ და მასპინძლობას თავად გაუწევენ. სავარაუდო თარიღად 2026 წელი სახელდება.