აქ რა მინდა, ეგეც არ ვიცი, არანაირი სამართალდარღვევა არ ჩამიდენია. პრესკარტა მქონდა და პოლიციელებს ვანახე დაკავების დროს. ჩემმა ოქმის შემდგენმა პოლიციელმა ის დალუქა, - ამის შესახებ „ტვ პირველის“ ჟურნალისტმა, ადმინისტრაციული წესით დაკავებულმა გიორგი მამნიაშვილმა სასამართლო პროცესზე განაცხადა.

ის 22 ნოემბერს, ადმინისტრაციული წესით დააკავეს. მამნიაშვილი საპროტესტო აქციაზე პროფესიულ მოვალეობას ასრულებდა, თუმცა, შსს მას ედავება, რომ სამართალდამცავებს არ ემორჩილებოდა, მათ ხელს უშლიდა და უმისამართოდ იგინებოდა.

უფრო კონკრეტულად, სასამართლო პროცესზე შსს-ს წარმომადგენელმა განმარტა, რომ მამნიაშვილი არღვევდა საზოგადოებრივ წესრიგს, იგინებოდა უმისამართოდ და ის არ დაემორჩილა სამართალდამცავების მოწოდებას.

მისივე თქმით, მიუხედავად პოლიციელების მოწოდებისა, რომ მამნიაშვილის ქმედებით ხელი ეშლებოდათ პროფესიული მოვალეობის შესრულებაში, მისი მხრიდან ეს გათვალისწინებული არ იქნა.

შსს-ს წარმომადგენლის თქმითვე, როცა გიორგი მამნიაშვილს არაერთხელ მიუთითეს, რომ პოლიციელებისთვის ხელი არ შეეშალა, მისი მხრიდან არაერთხელ იქნა უცენზურო სიტყვები გამოყენებული.

თავის მხრივ, ადვოკატი თორნიკე მიგინეიშვილი ადმინისტრაციული სამართალწარმოების შეწყვეტას ითხოვდა, ვინაიდან მისი თქმით, სამართალდარღვევას ადგილი არ ჰქონია.

ადვოკატის განმარტებით, მამნიაშვილი აქციაზე პროფესიულ, ჟურნალისტურ საქმიანობას ახორციელებდა. ის აქციაზე არა საკუთარი სურვილით, არამედ ვალდებულების შესასრულებლად იმყოფებოდა, რომელიც ტელეკომპანიასთან აქვს.

ადვოკატის თქმით, 22:10 საათზე მამნიაშვილმა სამსახურის „ჩათში“ ჩააგდო კონკრეტული მასალა, რომელიც მან აქციაზე გადაიღო, რაც ადასტურებს მის მიერ პროფესიული მოვალეობის შესრულებას. სწორედ 22:10 საათი არის მისი დაკავების დრო.

„პირველ რიგში, აქ რა მინდა, ეგეც არ ვიცი, არანაირი სამართალდარღვევა არ ჩამიდენია. პრესკარტა მქონდა და პოლიციელებს ვანახე დაკავების დროს. ჩემმა ოქმის შემდგენმა პოლიციელმა ის დალუქა. დაკავების მომენტში სხვა დაკავებულების ვიდეოს ვიღებდი, რომლებსაც უკან მივყვებოდი, თუ როგორ აკავებდნენ. მარიამ მეყანწიშვილის დაკავების კადრები სამსახურში გადავგზავნე, შემდეგ ცოტნე მირცხულავასა და ლუკა ჭოხონელიძის დაკავების კადრებს ვიღებდი, რა დროსაც ისმის ლაშა სალუქვაძის წამოძახილი, „ეგეც მიაყოლეთო“, - განაცხადა დაკავებულმა ჟურნალისტმა, გიორგი მამნიაშვილმა.

შსს-ს წარმომადგენლის თქმით, თავად ჟურნალისტიც ამბობს, რომ მას პრესკარტა ჩანთაში ჰქონდა, ჟურნალისტური ეთიკის კოდექსით კი, ჟურნალისტი გარჩევადი უნდა იყოს სხვებისთვის, როცა ჟურნალისტურ საქმიანობაში ასრულებს.

ცნობისთვის, გიორგი მამნიაშვილს ადმინისტრაციულ სამართალდარღვევათა კოდექსის 173-ე მუხლის პირველი ნაწილითა და 166-ე მუხლით გათვალისწინებული ქმედებების განხორციელებას ედავებიან, რაც პოლიციელის დაუმორჩილებლობასა და წვრილმან ხულიგნობას გულისხმობს.