გიორგი შერმადინის მეუღლე ეხმაურება კრიტიკოსებს, რომლებმაც ქართველი კალათბურთელის სიტყვა გააკრიტიკეს. შერმადინმა 2027 წლის ჩემპიონატის საკვალიფიკაციო ტურნირზე ბოლო შეხვედრა გამართა და თითქმის 20-წლიან სანაკრებო კარიერის დასასრულს გულშემატკივრებთან ერთად, საქართველოს პრემიერ- მინისტრს ირაკლი კობახიძეს მიმართა.
ანი ამაშუკელი მადლობას უხდის მათ, ვინც ქართველ სპორტსმენს მხარი დაუჭირა და მათაც, რომლებმაც ის გააკრიტიკეს.
„მადლობა უფალს, ყველაფრისათვის! ჩვენი ოჯახის სახელით, მინდა, მადლობა გადაგიხადოთ ყველას, ვინც გაიზიარეთ გიორგის ემოცია ეროვნული ნაკრების დატოვების გამო. ვისაც უნდა დანახვა, ყველა დაინახავს გიორგის თავდადებას და მონდომებას ხშირად საკუთარი ჯანმრთელობის ხარჯზე. მადლობა იმათაც, ვინც სალანძღავი სიტყვები არ დაიშურა, დამერწმუნეთ არც ამ ადამიანების მიმართ გვაქვს ბრაზი, გიორგის ყველა გულშემატკივარი ერთნაირად უყვარხართ! ყველანი ერთნაირად ძვირფასნი ხართ მისთვის! მხოლოდ სიკეთეს და სულიერ სიმშვიდეს გისურვებთ. მადლობა უფალს, რომ მადლიერების და დათმენის უნარი მოგვცა. მაინც „სიყვარული ატრიალებს დედამიწას“ და ყველას ურთიერთსიყვარულს და პატივისცემას გისურვებთ!“ - წერს ანი ამაშუკელი.
შეგახსენებთ, საქართველოს საკალათბურთო ნაკრებმა მსოფლიოს 2027 წლის ჩემპიონატის საკვალიფიკაციო ტურნირ მარცხით დაიწყო - საქართველომ უკრაინასთან მატჩი ანგარიშით 79:92 წააგო.
ეს შეხვედრა ქართველი გულშემატკივრების წინაშე ბოლო იყო გიორგი შერმადინისთვის, რომელიც თითქმის 20-წლიან სანაკრებო კარიერას ასრულებს. ნაკრებში მისი ბოლო მატჩი კი 30 ნოემბერს, ესპანეთში შედგება.
„ძალიან დიდი მადლობა, მინდა, გადავუხადო ჩვენს სახელმწიფოს, ბატონი პრემიერის მეთაურობით. დიდი მადლობა, ბატონო პრემიერო, რასაც სპორტისთვის აკეთებთ“, - ასე მიმართა მატჩის ბოლოს, გამოსამშვიდობებელ სიტყვაში გიორგი შერმადინმა ირაკლი კობახიძეს, რასაც გულშემატკივრების მხრიდან სტვენა და უარყოფითი რეაქცია მოჰყვა.