პოლიტიკურად შემიძლია შევაფასო, რომ ეს ყველაფერი არის ჩვეულებრივი ტერორიზმი, - განაცხადა ფრაქცია „ქართული ოცნების“ თავმჯდომარის პირველმა მოადგილემ, ლევან მაჭავარიანმა. დეპუტატი გამოეხმაურა ალეკო ელისაშვილის მიერ თბილისის საქალაქო სასამართლოს კანცელარიის შენობის დაწვის მცდელობის ფაქტს.

„ბატონმა ელისაშვილმა აღიარა ბრალი. პროტესტის ამგვარი ფორმით გამოხატვა მათთვის თუ მისაღები ფორმაა, ძალიან აცდენილები არიან ზოგადად რეალობას და ძალიან მძიმე მდგომარეობაში იმყოფებიან. სწორედ ამ ევრობიუროკრატების და ელჩების ხელშეწყობით ამ რადიკალებისთვის სახელმწიფო დამხობაც კი არ არის არალეგიტიმური. ჩვენ უკვე სახეზე გვაქვს ასეთი ფაქტები, რომელიც რადიკალიზმის ყველაზე უფრო რადიკალური გამოვლინებაა. მე არ ვიცი რა სამართლებრივ შეფასებას მისცემენ სამართალდამცავი უწყებები, რა მუხლით წარედგინება ბრალი თუმცა, პოლიტიკურად შემიძლია შევაფასო, რომ ეს ყველაფერი არის ჩვეულებრივი ტერორიზმი“, - აღნიშნა მაჭავარიანმა.

შსს-ს ინფორმაციით, დაკავებულია კოალიცია „ძლიერი საქართველო - ლელოს” ერთ-ერთი ლიდერი, ალექსანდრე ელისაშვილი, რომელმაც თბილისის საქალაქო სასამართლოს კანცელარიის შენობის დაწვა სცადა. მას ბრალს სავარაუდოდ, დღეს წარუდგენენ.