ორმაგი სტანდარტი და უსამართლო დამოკიდებულების მორიგი მაგალითი საქართველოს მიმართ - მმართველ გუნდში კიდევ ერთხელ აფასებენ ევროპარლამენტის გადაწყვეტილებას, რომელიც "გამჭვირვალობის კანონის" გამკაცრებას და გარე ჩარევების გამო, ახალი ზომების მიღებას ეხება.
თბილისში აცხადებენ, რომ ბრიუსელი სხვას ედავება იმას, რასაც თვითონ აკეთებს. ევროპარლამენტის გადაწყვეტილებით, ევროკავშირის ყველა ქვეყანას მოუწევს შექმნას ლობისტების რეესტრი, მათ ეკისრებათ ვალდებულება ახსნან დაფინანსებისა და გრანტების წარმომავლობა და დანიშნულება.
პარლამენტის ფრაქცია "ქართული ოცნების" თავმჯდომარის პირველი მოადგილის თქმით, ევროპამ აღიარა, რომ გამჭვირვალობა ნამდვილად ევროპული ღირებულების ნაწილი ყოფილა.
"მაშინ, როდესაც ჩვენ გვარწმუნებდნენ, თითქოს გამჭვირვალობა არ შეესაბამებოდა ევროპულ ღირებულებებს, დღეს, მადლობა ღმერთს, ევროპამ აღიარა, რომ გამჭვირვალობა ნამდვილად ევროპული ღირებულების ნაწილი ყოფილა. ეს არის ჩვეულებრივი ასმაგი სტანდარტი. ჩვენს ეს კანონი გვჭირდებოდა ჩვენი ქვეყნის უსაფრთხოებისთვის და იმისათვის, რომ გამჭვირვალე გამხდარიყო ის თანხები, რა თანხებიც ირიცხებოდა კოლექტიური გიგაურების და ლომჯარიების "ენჯეო" ორგანიზაციებში", - განაცხადა ლევან მაჭავარიანმა.