არავის შეუძლია, მთელი მსოფლიო სამუდამოდ მოატყუოს, პუტინსაც კი, - ამის შესახებ უკრაინის პრეზიდენტმა, ვოლოდიმირ ზელენსკიმ ირლანდიის პარლამენტში სიტყვით გამოსვლის დროს განაცხადა.
ზელენსკიმ ირლანდიას უკრაინელი ლტოლვილებისთვის თავშესაფრისა და დაცვის უზრუნველყოფისთვის, ასევე უკრაინისთვის ურყევი მხარდაჭერისთვის მადლობა გადაუხადა.
„ირლანდიამ ნათლად დაუჭირა მხარი ჩვენს დამოუკიდებლობას და ამ ომის სამართლიან დასრულებას. გმადლობთ, რომ არ კარგავთ რწმენას, ისევე როგორც ჩვენ არ ვკარგავთ რწმენას, რომ დადგება დღე, როდესაც მშვიდობით მივესალმებით ჩვენს ყველა მეგობარს უკრაინაში. როდესაც ერების ნამდვილი საზოგადოება გყავს, ვერავინ დაგვამარცხებს. ვერავინ შეძლებს მსოფლიოს დანგრევას მარტო, ვერც რუსეთი, ვერც თავისი რამდენიმე მეგობრით. ვერავინ შეძლებს მთელი მსოფლიოს სამუდამოდ მოტყუებას, ვერც პუტინი. ვერავინ შეძლებს ყველას წინააღმდეგ წასვლას", - განაცხადა მან.
ამასთან, ზელენსკიმ განაცხადა, რომ იმ რუსებს, რომლებიც უკრაინელებს კლავენ, სხვა ქვეყნებში შესვლა უნდა აეკრძალოთ. მისი თქმით, რუსეთს სურს უკრაინას, როგორც თავის საკუთრებას, ისე მოეპყროს.
„ადამიანის მეხსიერება ხშირად ხანმოკლეა და ყურადღება შეიძლება, დროებითი იყოს. ამიტომ, გთხოვთ, შეახსენოთ მსოფლიოს ყოველ ჯერზე, როცა ეს საჭიროა, რომ რუსეთის მიერ უკრაინაში შეჭრა არის აგრესიის კრიმინალური და არაპროვოცირებული აქტი, რომელიც სამართლიანობას ითხოვს. რუსეთს სურს უკრაინას, როგორც თავის საკუთრებას, ისე მოეპყროს. უკრაინელებს კი ისე მოეპყროს, თითქოს ისინი მის ეზოში უნდა იყვნენ, როგორც პირუტყვი. რუსმა მკვლელებმა თავისუფლად ვერ უნდა იმოგზაურონ მსოფლიოში, თითქოს არაფერი ცუდი არ ჩაუდენიათ. აგრესორმა პასუხი უნდა აგოს", - განაცხადა ზელენსკიმ.