სტრატეგიული მნიშვნელობის სარკინიგზო გზის მოდერნიზაცია, რომელმაც საქართველო ორ კონტინენტს შორის დამაკავშირებელ ხიდად აქცია დასრულებულია. სამხრეთ კავკასიის რეგიონში ყველაზე მასშტაბური 8 300 მეტრი სიგრძის სარკინიგზო გვირაბი, 100-კილომეტრიანი ახალი ლიანდაგი, ხიდები და სადგურები - მოდერნიზაციის გეგმა შესრულებულია. ახალი ინფრასტრუქტურით, შუა დერეფნის მნიშვნელობის კონტექსტში ტვირთის გადაზიდვის დრო მცირდება. სწორედ ისტორიული პროექტის სატრანზიტო ფუნქციის განვითარებასა და დაკავშირებადობის მნიშვნელობაზე აკეთებს აქცენტს პრემიერ-მინისტრი.

ახალი პროექტით რკინიგზის საექსპლუატაციო ხარჯებიც დაიკლებს. უღელტეხილის მონაკვეთზე იზრდება უსაფრთხოებაც. რკინიგზის სტაბილიზაციის პერიოდის დასრულების შემდეგ კი თბილისიდან ბათუმამდე მგზავრობის დრო 30 წუთით შემცირდება.

განახლებული სარკინიგზო ინფრასტრუქტურის საშუალებით, ტვირთი რომელიც ქვეყანას გაივლის, დანიშნულების ადგილზე უმოკლეს დროში ჩავა და გადაზიდვის მიმართულებას გააუმჯობესებს. საქართველოს რკინიგზაში ამბობენ, რომ ახალი ხაზის ამოქმედება, ქვეყანას საერთაშორისო სატრანსპორტო მარშრუტში, კიდევ უფრო ეფექტურს გახდის.

მოდერნიზაციის პროექტზე, საქართველოს რკინიგზის და ჩინეთის 23-ე ბიუროს ერთობლივმა ჯგუფმა ურთულეს გეოლოგიურ პირობებში იმუშავა. მასშტაბური ინფრასტრუქტურული პროექტის ღირებულება დაახლოებით მილიარდი ლარია.