უკრაინის პრეზიდენტმა, ვოლოდიმირ ზელენსკიმ განაცხადა, რომ აშშ-ის ლიდერთან შეხვედრისას უკრაინისთვის უსაფრთხოების გარანტიების 30-50 წლით გაცემა სთხოვა.

ცნობისთვის, ამჟამად მხარეები უსაფრთხოების 15-წლიანი გარანტიების გაცემის შესაძლებლობას განიხილავენ, რომელთა გახანგრძლივებაც შესაძლებელი იქნება.

„მე ტრამპს ვუთხარი – ჩვენთან ომი უკვე თითქმის 15 წელია, გრძელდება, ამიტომ ძალიან დიდი სურვილია, რომ გარანტიები უფრო ხანგრძლივი იყოს. მე მას ვუთხარი, რომ უკრაინას დიდი სურვილი აქვს განვიხილოთ 30-40-50 წლიანი გარანტიების გაცემის შესაძლებლობა“, – თქვა ზელენსკიმ.

ზელენსკიმ ასევე განაცხადა, რომ უკრაინაში საომარი მდგომარეობის რეჟიმი მხოლოდ ისეთი უსაფრთხოების გარანტიების მიღების შემდეგ დასრულდება, რომლებსაც აშშ-ის კონგრესი და უკრაინის პარლამენტი დაამტკიცებენ.

უკრაინის ლიდერის თქმით, ზავი უსაფრთხოების გარანტიების გარეშე არ ნიშნავს ომის დასრულებას.

ზელენსკი ამბობს, რომ გარანტიები უნდა მოიცავდეს მონიტორინგს და პარტნიორების ადგილზე ყოფნას.