ესპანეთის საგარეო საქმეთა მინისტრი ხოსე მანუელ ალბარესი მიიჩნევს, რომ ევროპამ უნდა გააერთიანოს თავისი თავდაცვის ინდუსტრია, რათა ჰქონდეს საკუთარი შეკავების საშუალებები, „არ იყოს დამოკიდებული მესამე ქვეყნებზე“ და „ევროპული არმიის შექმნისკენაც კი ისწრაფოდეს“. ესპანეთის საგარეო საქმეთა სამინისტროს ხელმძღვანელის განცხადებას EFE ციტირებს.

ალბარესმა კომენტარი გააკეთა მიმდინარე გლობალურ ვითარებაზე და აღიარა, რომ აშშ-ის ვენესუელაში ჩარევით და გრენლანდიის წინააღმდეგ მუქარით, „საერთაშორისო წესრიგის შეცვლის მცდელობას ვხედავთ“.

მისი თქმით, ევროპამ უნდა გააცნობიეროს „საკუთარი ძალა“ და განამტკიცოს პრინციპები, რომლებიც მოიცავს კონტინენტზე ომის დაუშვებლობას.

ესპანელმა მინისტრმა სინანული გამოთქვა, რომ ვაშინგტონსა და ბრიუსელს შორის ათწლეულების განმავლობაში ძლიერი ალიანსის შემდეგ, რომელიც საერთო ღირებულებებსა და ორმხრივ სარგებელზეა დაფუძნებული, გამოჩნდა დონალდ ტრამპის ადმინისტრაცია, რომელსაც „განსხვავებული შეხედულებები“ აქვს.

მისივე თქმით, ევროპელები „არ უნდა დანებდნენ“.

ამავდროულად, მას არ სჯერა, რომ ტრამპის მუქარა ნატოს კოლაფსს გამოიწვევს.

„მე ამას შესაძლებლობადაც კი არ მივიჩნევ“, – განაცხადა ალბარესმა.