„ოცნებამ“ შემოგვთავაზა პროპაგანდისტული პანელური დისკუსია და არ გამოვა ეგრე რა - „რა შევუკვეთე, რა ჩამოვიდა“ არის ეს სინამდვილეში, - ამის შესახებ პარტია "გახარია საქართველოსთვის" დეპუტატმა, გიორგი შარაშიძემ ჟურნალისტებთან განაცხადა.

შარაშიძის თქმით, მისი პარტია უარს ამბობს არა დებატებზე, არამედ „ოცნების“ მიერ შემოთავაზებულ პროპაგანდისტულ ფარსზე.

„ჩვენ დებატებზე უარს არ ვამბობთ. ჩვენ უარს ვამბობთ „ოცნების“ მიერ შემოთავაზებულ პროპაგანდისტულ ფარსზე, საკუთარი სატელიტური პარტიების და დახელფასებული ექსპერტების მონაწილეობით, დაანონსებული დებატები ისევ საკუთარი პროპაგანდის ინსტრუმენტად გამოიყენოს. რეალურ დებატებში მონაწილეობაზე ჩვენ არა მხოლოდ მზად ვართ, არამედ ახლა, აქედან, პარლამენტის ტრიბუნიდან მოვუწოდებ მას, რომ ნებისმიერ ტელევიზიაში მზად ვართ მოქალაქეებისთვის აქტუალურ ნებისმიერ საკითხზე ვედებატოთ.

იმის არ იყოს, „რა შევუკვეთე, რა ჩამოვიდაო“, დიდი ბოდიში, მაგრამ დებატებს რომ მიანონსებ და მერე პანელურ დისკუსიაზე მიწვევ, სადაც შენ შენი ტელევიზია, სატელიტური პარტიები და ექსპერტები მოგვყავს, ამას ღირსებასთანაც არანაირი კავშირი არ აქვს. ერთს ამბობ და მეორეს აკეთებ, ხომ?! ეს არ არის დებატები. ჩვენ როდესაც ვამბობდით, რომ დებატის ნებისმიერ ფორმატზე ვიყავით თანახმა, ვგულისხმობდით რეალურ დებატებს, „ოცნებამ“ კი შემოგვთავაზა პროპაგანდისტული პანელური დისკუსია და არ გამოვა ეგრე რა. „რა შევუკვეთე, რა ჩამოვიდა“ არის ეს სინამდვილეში,“ - განაცხადა შარაშიძემ.

კითხვაზე, „იაგო ხვიჩია არის „ქართული ოცნების“ სატელიტი ოპოზიციონერი?“, შარაშიძე დადებითად პასუხობს.

„დიახ, რა თქმა, უნდა. თქვენ იცით, რომ არსებობს ორი „გირჩი“. არსებობს „ოცნების“ „გირჩი“, „ნაცების“ „გირჩი“. ჩვენ არც ერთს და არც მეორეს რეალურ ოპოზიციად, ცხადია, არ განვიხილავთ,“ - აღნიშნა მან.

ცნობისთვის, პარტიამ „გახარია საქართველოსთვის“ „რუსთავი 2“-ის ეთერში დღეს გასამართ დებატებში მონაწილეობაზე უარი განაცხადა.