შავი ზღვის სანაპიროზე მდებარე საქართველოს მნიშვნელოვანი პოტენციალი აქვს ტრანსსასაზღვრო ტრანსპორტირების განვითარების მხრივ, - განაცხადა „დღის ქრონიკაში“ ჩინეთის სახალხო რესპუბლიკის ელჩმა ჭოუ ციენმა. ელჩმა აღნიშნა, რომ შავი ზღვის რეგიონი ევრაზიის და ჩრდილოეთისა და სამხრეთის დამაკავშირებელი სასიცოცხლოდ მნიშვნელოვანი გეოგრაფიული გზაჯვარედინია.

„შავი ზღვის სანაპიროზე მდებარე საქართველოს მნიშვნელოვანი პოტენციალი აქვს ტრანსსასაზღვრო ტრანსპორტირების განვითარების მხრივ. „შუა დერეფნის“ დაჩქარებული მშენებლობით, შავი ზღვის რეგიონი იქცევა ჩინეთი - ცენტრალური აზია - კავკასია - ევროპის ლოგისტიკური დერეფნის მნიშვნელოვან ცენტრად. ჩინეთი მზადაა, ითანამშრომლოს საქართველოსთან და რეგიონულ პარტნიორებთან ლოგისტიკური მოდერნიზაციის სფეროში თანამშრომლობის გასაძლიერებლად, გადაზიდვების ეფექტურობის გასაუმჯობესებლად და ერთობლივად ააშენოს ეფექტური და მწვანე ევრაზიული სახმელეთო-საზღვაო სატრანსპორტო დერეფანი“, - განაცხადა ელჩმა.

მისივე თქმით, საქართველოს ხელსაყრელი გეოგრაფიული მდებარეობა აქვს და აქტიურად უწყობს ხელს „შუა დერეფნისა“ და „სარტყლისა და გზის“ ინიციატივის შესაბამისობაში მოყვანას, აქტიურად ავითარებს სატრანსპორტო ინფრასტრუქტურას, როგორიცაა მაგისტრალები, რკინიგზა, პორტები და აეროპორტები.

„ურთიერთდამხმარე უპირატესობებსა და საერთო განვითარების მიზნებზე დაყრდნობით, ჩინეთი მიიჩნევს, რომ შემდეგი სფეროები ყველაზე მიმზიდველია ჩინური ინვესტიციებისთვის: პირველი, სუფთა ენერგია და მწვანე განვითარება. საქართველო მთიანი და მდინარეებით უხვი ქვეყანაა, რაც მას სუფთა ენერგორესურსებით მდიდარს ხდის. ჩინეთი სუფთა ენერგორესურსების ინდუსტრიაში გლობალური ლიდერია, იგი მსოფლიოში პირველ ადგილზეა ქარის ენერგიის, ჰიდროელექტროსადგურების და ფოტოელექტრული ენერგიის დამონტაჟებული რაოდენობით. ჩინეთს აქვს სრულყოფილი სამრეწველო ჯაჭვი და თვალსაჩინო უპირატესობა ხარჯების მხრივ. აღნიშნულ სფეროებში ორ მხარეს შორის თანამშრომლობის ფართო პერსპექტივები არსებობს.

მეორე, თანამშრომლობა სასოფლო-სამეურნეო პროდუქტების გადამუშავებასა და კვებით სამრეწველო ჯაჭვში. განახლებული თავისუფალი ვაჭრობის შეთანხმების უპირატესობების გამოყენებით, ორი მხარე, სავარაუდოდ, უფრო მეტს მიაღწევს სასოფლო-სამეურნეო ვაჭრობაში. საქართველოს უხვი სასოფლო-სამეურნეო რესურსი აქვს, ჩინეთი კი გლობალური ლიდერია თესვისა და კულტივირების ტექნოლოგიებში. ორ მხარეს შეუძლია აქტიურად გააღრმაოს თანამშრომლობა მთელ ინდუსტრიულ ჯაჭვში ფერმიდან სუფრამდე, ისეთ სფეროებში, როგორიცაა თესვა, მეცხოველეობა, მეთევზეობა და საკვების გადამუშავება. ეს არა მხოლოდ გაზრდის სასოფლო-სამეურნეო პროდუქტების დამატებულ ღირებულებას, არამედ მომხმარებლებს შესთავაზებს უფრო მაღალი ხარისხის და ხელმისაწვდომ საქონელს, რაც ორმხრივად მომგებიან სიტუაციას შექმნის.

მესამე, ტრანსპორტირება და ციფრული ინფრასტრუქტურა. საქართველოს ხელსაყრელი გეოგრაფიული მდებარეობა აქვს და აქტიურად უწყობს ხელს „შუა დერეფნისა“ და „სარტყლისა და გზის“ ინიციატივის შესაბამისობაში მოყვანას, აქტიურად ავითარებს სატრანსპორტო ინფრასტრუქტურას, როგორიცაა მაგისტრალები, რკინიგზა, პორტები და აეროპორტები. ჩინური კომპანიების ინფრასტრუქტურული შესაძლებლობები ფართოდ არის აღიარებული, მათ აქტიური მონაწილეობა მიიღეს საქართველოს E60 და ჩრდილოეთ-სამხრეთის დერეფნის მაგისტრალების განახლებასა და რეკონსტრუქციაში. მომავალში, ინფრასტრუქტურული თანამშრომლობა ჩინეთ-საქართველოს შორის გრძელვადიანი თანამშრომლობის ძირითად სფეროდ დარჩება.

მეოთხე, ციფრული ეკონომიკა და ხელოვნური ინტელექტი. ჩინეთისა და საქართველოს შესაბამისმა ორგანოებმა ხელი უკვე მოაწერეს ურთიერთგაგების მემორანდუმებს ციფრული ეკონომიკის და ხელოვნური ინტელექტის სფეროებში თანამშრომლობის შესახებ, რაც უზრუნველყოფს ინსტიტუციურ გარანტიებს ამ სფეროებში თანამშრომლობისთვის.

ჩინეთის ციფრული ეკონომიკა მსოფლიოში ერთ-ერთ უდიდეს ეკონომიკად ითვლება და მზადაა, აქტიურად გააზიაროს საკუთარი ტექნოლოგიები და გამოცდილება ისეთ სფეროებში, როგორიცაა ჭკვიანი ქალაქები, 5G და ხელოვნური ინტელექტი“, - აღნიშნა საქართველოში ჩინეთის ელჩმა.