თურმე, უკრაინულ მხარესთან აქტიური თანამშრომლობით საქართველოს ინტერესების საზიანოდ ვაწვდიდი სამხედრო სფეროში არსებული ვითარების შესახებ ინფორმაციას. არცერთი მტკიცებულება არ დევს ჩემი ურთიერთობის უკრაინასთან, ან რომ რამე სახის სამხედრო ინფორმაციას მოვიპოვებდი, ან ვინმეს ვაძლევდი , - ამის შესახებ ე.წ. საბოტაჟის საქმეზე ბრალდებულმა გიორგი ვაშაძემ სასამართლო პროცესზე განაცხადა.

როგორც ის განმარტავს, მის საქმეში მის წინააღმდეგ არანაირი მტკიცებულება არ არსებობს.

ვაშაძის თქმითვე, თუკი, სხვა საქმეებში "პოლიციელები ცრუ ჩვენებებს აძლევდნენ", ამ საქმეში ესეც არ არის.

"რა მოხდა ისეთი, რომ ყველა ერთადაა საბრალდებო სკამზე წარმოდგენილი და პროკურატურა საოცარ მუხლებს გვედავება? - უცხოეთთან თანამშრომლობას. კითხვა დავსვათ, რატომ ხდება ეს და საიდან დაიწყო პოლიტიკური კრიზისი? პროკურატურა ყალბად წარმოაჩენს ამ მასალებში იმ გარემოებებს, რაც მოხდა. ეს ყველაფერი უკრაინაში ომით დაიწყო, მაგრამ ყველაფერი ევროკავშირში გაწევრიანების საკითხით დაიწყო. პირველი დიდი აქცია რაზე იყო? ვთხოვდით ხელისუფლებას განაცხადი შეეტანათ ევროკავშირში გაწევრიანებაზე... ევროკავშირში გაწევრიანება საქართველოს კონსტიტუციაში გვაქვს ჩაწერილი, 78-ე მუხლი პირდაპირ ამბობს ამას. მე ვალდებული ვიყავი ყველაფერი გამეკეთებინა, რომ საქართველო ევროკავშირის წევრი გამხდარიყო, მეორე მხარე კი ნამდვილად ეწოდა საბოტაჟს. რა მოხდა? უკრაინამ და მოლდოვამაც კანდიდატის სტატუსი მიიღო, საქართველომ - ვერა. პროკურატურამ დამალა,რომ პარლამენტში უმრავლესობის წარმომადგენლებს მივმართე, 7-პუნქტიანი გეგმა შევთავაზე კობახიძეს, შალვა პაპუაშვილს. ვუთხარი, ჩვენ ჩვენი ქვეყნის ინტერესებიდან გამომდინარე უკან ვიხეთ და აგერ ამ პუნქტებზე ვიმუშაოთ-მეთქი და შევთავაზე ევროკავშირის ქვეყნებში ერთობლივი ვიზიტები. მხოლოდ ის ჩანაწერები რატომ მოიტანეთ, რაც მართალია ჩემს სასარგებლოდაა, მაგრამ ამოიღეთ ის ჩანაწერები, სადაც ამას ვთავაზობდი მათ. ეს ყველაფერი უკუღმაა ბრალში წარმოდგენილი. უმრავლესობის მხრიდან ცინიზმი მივიღეთ, არც ერთი მუხლი არ შეასრულეს. ისევ ჩვენ შევქმენით პარლამენტში სამუშაო ჯგუფები, რომ ოღონდ კანდიდატის სტატუსი მიგვეღო და მივუტანეთ "ქართულ ოცნებას". ამის საპასუხოდ - არა, არაფერსაც არ გავაკეთებთ და არც ერთ რეფორმას არ შევასრულებთო, გვიპასუხეს. ამის შემდეგ კამპანია დავიწყეთ ხელმოწერების შეგროვება, ეს საბოტაჟია? ამას ხელისუფლების წარმომადგენლებმა "რუსული კანონი" მიიღეს, აი საბოტაჟი!.. მნიშვნელოვანია ეს ყველაფერი იცოდეთ პროკურორებმა, ამის შემდეგ ეს კანონი უკან გაიტანეს და კანდიდატის სტატუსი მოგვცეს...

ხალხის პროტესტი რატომ არის ამოგლეჯილი ამ საქმეში? თურმე ჩვენი მოწოდების შედეგად გამოვიდა ხალხი, ტყუილი! 28-ში ირაკლი კობახიძე გამოვიდა და თქვა, რომ ევროკავშირთან ინტეგრაციაზე მოლაპარაკებებს წყვეტდა, ეს იყო ყველაფრის რეალობა. პროკურატურამ თქვა თურმე, 2022 წელს, ჩვენ გავგიჟდით და ვთქვით, რუსეთს სანქციები დაუწესეთო. თურმე, მე უკრაინულ მხარესთან აქტიური თანამშრომლობით საქართველოს ინტერესების საზიანოდ ვაწვდიდი სამხედრო სფეროში არსებული ვითარების შესახებ ინფორმაციას. არც ერთი მტკიცებულება არ დევს ჩემი ურთიერთობის უკრაინასთან, ან რომ რამე სახის სამხედრო ინფორმაციას მოვიპოვებდი, ან ვინმეს ვაძლევდი...

ჩამომითვალეთ სამი მტკიცებულება ჩემთან მიმართებაში, რომ საქმის განხილვა გაგრძელდეს...

გამოვიდა კობახიძე და განცხადება გააკეთა, კობახიძის განცხადებას ახლა ამ საქმეში ჯიბეში გვიდებთ", - განაცხადა ვაშაძემ.

მისი სიტყვის შემდეგ, ზურაბ გირჩი ჯაფარიძემ დაიწყო სიტყვით სარგებლობა, იქამდე კი მცირე რეპლიკით მიმართა სასამართლოს: "სანამ საქმეს დახურავთ, იქნებ ვაშაძის საქმე ცალკე გამოყოთ", - განაცხადა ჯაფარიძემ.

ცნობისთვის, ე.წ. საბოტაჟის საქმეზე გენერალურმა პროკურატურამ მიხეილ სააკაშვილს, გიორგი ვაშაძეს, ნიკა გვარამიას, ნიკა მელიას, ზურაბ გირჩი ჯაფარიძეს, ელენე ხოშტარიას, მამუკა ხაზარაძესა და ბადრი ჯაფარიძეს ბრალდება წარუდგინა.

უფრო კონკრეტულად, გიორგი ვაშაძეს და ზურაბ გირჩი ჯაფარიძეს ბრალი სისხლის სამართლის კოდექსის 318-ე მუხლის პირველი ნაწილით და 319-ე მუხლით წარედგინათ, რაც საბოტაჟს და უცხო ქვეყნისათვის მტრულ საქმიანობაში დახმარებას გულისხმობს. აღნიშნული სასჯელის სახედ და ზომად 7-დან 15- წლამდე თავისუფლების აღკვეთას გულისხმობს.

ელენე ხოშტარიას ბრალდება საქართველოს სისხლის სამართლის კოდექსის 318-ე მუხლის პირველი ნაწილით, 319-ე მუხლით და 321-ე პრიმა მუხლის პირველი ნაწილით წარედგინა, რაც საბოტაჟის, აღნიშნული დანაშაულისთვის მატერიალური რესურსების მიწოდებას და უცხო ქვეყნისათვის მტრულ საქმიანობაში დახმარებას გულისხმობს.

ნიკა გვარამიას, ნიკა მელიას, მამუკა ხაზარაძეს და ბადრი ჯაფარიძეს ბრალდება საქართველოს სისხლის სამართლის კოდექსის 318-ე მუხლის პირველი ნაწილით წარედგინათ, რაც საბოტაჟს გულისხმობს.

მიხეილ სააკაშვილს ბრალდება სისხლის სამართლის კოდექსის 317-ე მუხლით აქვს წარდგენილი, რაც საქართველოს კონსტიტუციური წყობილების ძალადობით შეცვლისაკენ ან სახელმწიფო ხელისუფლების დამხობისაკენ მოწოდებას გულისხმობს.

აღნიშნულ საქმეში გიორგი ვაშაძეს და ზურაბ გირჩი ჯაფარიძეს აღკვეთის ღონისძიების სახით 30 000-ლარიანი, მამუკა ხაზარაძესა და ბადრი ჯაფარიძეს კი 1 მილიონი ლარი გირაო აქვთ შეფარდებული.