ახალციხეში, კოსტავას ქუჩაზე მდებარე კორპუსის მეხუთე სართულიდან გადმოვარდნილი ქალი კლინიკა „იმედში“ გარდაიცვალა. როგორც სამედიცინო დაწესებულებაში განგვიცხადეს, მას სიცოცხლისთვის შეუთავსებელი დაზიანებები აღმოაჩნდა.
„შემოიყვანეს ცოცხალი, მაგრამ უგონო მდგომარეობაში იყო. ჩაუტარდა კვლევები, სიცოცხლისთვის შეუთავსებელი დაზიანებები აღმოაჩნდა და რამდენიმე საათში გარდაიცვალა“,- გვითხრა, სამედიცინო დაწესებულების კლინიკურმა მენეჯერმა, მზია კაკოშვილმა.
შემთხვევა გუშინ, 27 მაისს ახალციხეში ე.წ. ხუთსართულიანების დასახლებაში მოხდა. თვითმხილველების ინფორმაციით, ქალი რომელიც მეხუთე სართულზე ცხოვრობდა ფანჯრიდან გადმოვარდა.
მომხდარზე, გამოძიება სისხლის სამართლის კოდექსის 115-ე მუხლით მიმდინარეობს, რაც თვითმკვლელობამდე მიყვანას გულისხმობს.