პოლონეთის პრეზიდენტმა კაროლ ნავროცკიმ განაცხადა, რომ მან, შესაძლოა, უკრაინის პრეზიდენტს ვოლოდიმირ ზელენსკის პოლონეთის უმაღლესი ჯილდო, თეთრი არწივის ორდენი, ჩამოართვას. ნავროცკის უკმაყოფილება გამოიწვია იმ ფაქტმა, რომ რამდენიმე დღის წინ ზელენსკიმ უკრაინის შეიარაღებული ძალების ერთ-ერთ ქვედანაყოფს „უკრაინის მეამბოხე არმიის გმირების“ სახელი მიანიჭა. პოლონური მხარე მიიჩნევს, რომ „უკრაინის მეამბოხე არმია“ ვოლინის ტრაგედიასთან არის დაკავშირებული.

„8 ივნისს, თეთრი არწივის ორდენის კაპიტულის სხდომა გაიმართება. გამოვედი წინადადებით დღის წესრიგში უკრაინის პრეზიდენტისთვის ვოლოდიმირ ზელენსკისთვის გადაცემული ჯილდოს ჩამორთმევის საკითხი შევიტანოთ“, - განაცხადა ნავროცკიმ. როგორც პოლონეთის ლიდერმა აღნიშნა, უკრაინის ერთ-ერთი სამხედრო დანაყოფისთვის „უკრაინის მეამბოხეთა არმიის გმირების“ სახელის მინიჭებით, ზელენსკიმ „რუსულ პროპაგანდას შესანიშნავი მასალა მისცა. ძალიან კრიტიკულად ვაფასებ აღნიშნულ გადაწყვეტილებას“, - თქვა ნავროცკიმ.

ზელენსკის თეთრი არწივის ორდენი ნავროცკის წინამორბედმა, ანდჟეი დუდამ 2023 წლის 5 აპრილს გადასცა.