ევროკავშირი თურქეთთან ვიზალიბერალიზაციაზე მუშაობს. ამის შესახებ ინფორმაციას გამოცემა „პოლიტიკო" ევროპელ მაღალჩინოსანზე დაყრდნობით ავრცელებს. გამოცემის ინფორმაციით, ევროკავშირი თურქეთთან სავიზო რეჟიმის ლიბერალიზაციაზე მუშაობს, რაც ანკარაში ევროკავშირის უმაღლესი წარმომადგენლის, კაია კალასის, შინაგან საქმეთა და მიგრაციის საკითხებში ევროკომისრის, მაგნუს ბრუნერისა და გაფართოების საკითხებში ევროკომისრის, მარტა კოსის ვიზიტს მოყვა.

წამყვანი ევროპული კვლევითი ცენტრების, მაგალითად European Policy Centre ან Carnegie Europe-ის ანალიტიკოსები მიუთითებენ, რომ ევროკავშირსა და თურქეთს შორის ურთიერთობა დიდი ხანია გადავიდა ე.წ. „ტრანზაქციულ" მოდელზე.

ექსპერტების აზრით, ახალი ევროკომისრების, კაია კალასის ხელმძღვანელობით, ეს ნაბიჯი არის არა თურქეთის ევროპული მომავლის აღიარება, არამედ კონკრეტული გეოპოლიტიკური ფასის გადახდა. მათი აზრით, ბრიუსელს ჰაერივით სჭირდება ანკარას დახმარება მიგრაციული ნაკადების მართვაში, შავ ზღვასა და სამხრეთ კავკასიაში სტაბილურობის შესანარჩუნებლად და რუსეთისთვის სანქციების გვერდის ავლის პრევენციისთვის.

ანალიტიკოსების დიდი ნაწილი სკეპტიკურად უყურებს სრული უვიზო მიმოსვლის პერსპექტივას უახლოეს მომავალში. მიზეზი თურქეთის შიდა პოლიტიკაა - თურქეთს შესასრულებელი დარჩა 6 ფუნდამენტური კრიტერიუმი, მათ შორის ანტიტერორისტული კანონმდებლობის შეცვლა. ექსპერტები აღნიშნავენ, რომ ერდოღანის მთავრობა უსაფრთხოების ამ კანონებს საკუთარი ძალაუფლების ვერტიკალის საყრდენად მიიჩნევს და მათ ევროკავშირის მოთხოვნით არ შეამსუბუქებს.

შესაბამისად, ანალიტიკოსები ელიან, რომ ბრიუსელი და ანკარა ეცდებიან იპოვონ „კომპრომისული ფორმულირება" ან კრიტერიუმების გვერდის ავლით მიაღწიონ შეთანხმებას.

ამასთან, ევროპელი ანალიტიკოსები ხაზს უსვამენ, რომ ვიზალიბერალიზაციის ყველაზე დიდი ბარიერი არა ბრიუსელში, არამედ ევროკავშირის წევრი ქვეყნების დედაქალაქებშია, განსაკუთრებით საფრანგეთსა და გერმანიაში. ამიტომ, ექსპერტები ვარაუდობენ, რომ მაქსიმუმი, რასაც ანკარა მიიღებს, იქნება გრძელვადიანი, მრავალჯერადი ვიზების გაცემის პროცედურის გამარტივება ბიზნესმენებისთვის, სტუდენტებისა და მეცნიერებისთვის და არა კლასიკური უვიზო რეჟიმი.