აშშ-ის პრეზიდენტმა დონალდ ტრამპმა კიდევ ერთხელ გაააქტიურა რეზონანსული პოლიტიკური პოზიცია ვაშინგტონის ე.წ. "დიფ სთეითის" შესახებ და საკუთარი მენტალური ჯანმრთელობის გარშემო მიმდინარე კრიტიკა ამ ფარული სისტემის აქტიურობას დაუკავშირა.

სოციალურ ქსელ Truth Social-ში, ცნობილი ამერიკელი ფსიქოლოგისა და ტელეწამყვანის, ფილიპ მაკგროუს მხარდამჭერი სტატიის გაზიარებისას, თეთრი სახლის ლიდერმა პირდაპირ მიანიშნა, რომ მისი დისკრედიტაციის მცდელობების მიღმა უსაფრთხოების სტრუქტურებისა და ბიუროკრატიული აპარატის არაფორმალური გავლენები დგას. პრეზიდენტის ეს განცხადება მიზნად ისახავს იმ სისტემურ დაპირისპირებაზე ხაზგასმას, რომელსაც ის, საკუთარი მტკიცებით, თეთრ სახლში მისვლის პირველი დღიდანვე აწყდება.

აშშ-ის პრეზიდენტმა დონალდ ტრამპმა სოციალურ პლატფორმა Truth Social-ზე გამოაქვეყნა ფილიპ მაკგროუს ვრცელი ანალიტიკური სტატია, რომელიც პრეზიდენტის კოგნიტურ უნარებსა და აკადემიურ თუ ბიზნეს მიღწევებს ეხება.

აღნიშნულ პუბლიკაციას ტრამპმა შემდეგი შინაარსის კომენტარი დაურთო: "მადლობა დიდ დოქტორ ფილს. დიფ სთეითი არასოდეს იძინებს".

მაკგროუს სტატიაში, რომელსაც პრეზიდენტი აზიარებს, საუბარია ტრამპის სამედიცინო ისტორიაზე, კერძოდ ჩატარებულ ნევროლოგიურ შემოწმებებსა და მონრეალის კოგნიტური შეფასების ტესტში მიღებულ 30-დან 30 ქულაზე.

სტატიის ავტორი მიუთითებს, რომ ოპონენტების მხრიდან ამ მონაცემების უგულებელყოფა პოლიტიკური მოტივებით არის განპირობებული, რადგან სტატიაში ავტორი პირდაპირ ამბობს, რომ MoCA არის ზუსტად ის ტესტი, რომლის ჩაბარებასაც კრიტიკოსები თავად ტრამპისგან დაჟინებით მოითხოვდნენ, თუმცა ჯო ბაიდენმა ამავე ტესტის გავლაზე კატეგორიული უარი განაცხადა.

დოქტორი ფილი ამას უწოდებს "ინტელექტუალურ არაკეთილსინდისიერებას" და მიუთითებს, რომ როგორც კი ტრამპმა იდეალური ქულა დადო, კრიტიკოსებმა მაშინვე შეცვალეს წესები, გადაწიეს ფინიშის ხაზი და კოგნიტური ჯანმრთელობის თემიდან მყისიერად გადავიდნენ დაბალი ინტელექტის დაბრალებაზე.

გარდა ამისა, ფილიპ მაკგროუ სტატიაში პირდაპირ საუბრობს იმ სისტემურ ზეწოლაზე, რომლის პირობებშიც ტრამპს მოღვაწეობა უწევს.

ავტორის განცხადებით, პრეზიდენტის წინააღმდეგ მიმართულია "90%-ით მტრულად განწყობილი მედია აპარატი", "პოლიტიკურად მოტივირებული კრიტიკოსები", "მოქმედი ადმინისტრაციის ინსტიტუციური წნეხი" და "უპრეცედენტო სამართლებრივი კამპანია", რომლის მიზანიც, მისი შეფასებით, ტრამპის კანდიდატურის ჩაშლა იყო მანამ, სანამ ის საერთოდ დაიწყებოდა.

მაკგროუს თქმით, ამ მასშტაბის გამოწვევებთან გამკლავება და არჩევნებში ორგზის გამარჯვება არაჩვეულებრივ ინტელექტუალურ და ადაპტაციურ უნარებს მოითხოვს.

პუბლიკაციაში განსაკუთრებული ყურადღება ეთმობა პრეზიდენტის აკადემიურ და ეკონომიკურ ბექგრაუნდს, როგორც მისი ინტელექტის პრაქტიკულ მტკიცებულებას. დოქტორი ფილი აღნიშნავს, რომ ტრამპის მიერ პენსილვანიის უნივერსიტეტის უორტონის ბიზნესის სკოლის დასრულება, ფსიქომეტრიულ კვლევებზე დაყრდნობით, ადასტურებს, რომ მისი სავარაუდო IQ დიაპაზონი 125-დან 135-მდეა, რაც "უმაღლეს" (Superior) ინტელექტუალურ კლასიფიკაციას შეესაბამება.

სტატიის მიხედვით, ოპონენტების მცდელობა, პრეზიდენტი არაკომპეტენტურად წარმოაჩინონ, სრულ წინააღმდეგობაში მოდის მის რეალურ მიღწევებთან.

გარდა ამისა, ავტორი ეყრდნობა რობერტ სტენბერგის ინტელექტის ცნობილ თეორიას და ხაზს უსვამს ტრამპის „პრაქტიკულ და ადაპტაციურ ინტელექტს" (ეგრეთ წოდებულ Street Smarts-ს). მაკგროუს შეფასებით, სწორედ ამ ტიპის უნარებმა მისცა ტრამპს შესაძლებლობა, აეშენებინა გლობალური ბიზნეს იმპერია, გაეძლო უპრეცედენტო პოლიტიკური წნეხისთვის და ორჯერ მოეგო აშშ-ის საპრეზიდენტო არჩევნები.

სტატიაში აღნიშნულია, რომ კრიტიკოსები მიზანმიმართულად უგულებელყოფენ ინტელექტის ამ ფორმას, რადგან ის სტანდარტულ აკადემიურ ჩარჩოებში არ ჯდება, თუმცა რეალურ პოლიტიკურ ბრძოლაში გადამწყვეტ უპირატესობას უზრუნველყოფს.

საკუთარ პოსტში "დიფ სთეითის" ფაქტორის წინ წამოწევით, დონალდ ტრამპმა მიმდინარე მედიაკამპანია შეაფასა არა როგორც ცალკეული პოლიტიკური ჯგუფების ოპოზიციური აზრი, არამედ როგორც ვაშინგტონის გავლენიანი არაფორმალური სისტემის მორიგი აქტივობა მისი ადმინისტრაციის წინააღმდეგ.