2026 წელს საქართველოს პორტების საოპერაციო ეფექტურობის მნიშვნელოვანმა ზრდამ და გამტარუნარიანობის პროგრესმა საქართველოს სატრანზიტო ფუნქციის მნიშვნელობა კიდევ უფრო მასშტაბური გახადა. სახელმწიფო და კერძო სექტორის თანამშრომლობამ, მინიმუმამდე დაყვანილმა ბიუროკრატიამ და თანამედროვე საოპერაციო პრაქტიკის დანერგვამ ქართული ნავსადგურების ტვირთამწეობა მიმდინარე წლის 6 თვეში, გასული წლის ანალოგიურ პერიოდთან შედარებით, 19 პროცენტით, 10.7 მილიონამდე გაზარდა. ამავდროულად გაიზარდა პორტების მიერ დამუშავებული ტვირთების მოცულობაც. ეკონომიკის სამინისტროში ქვეყნის, როგორც შუა დერეფნის საკვანძო ნაწილის, კიდევ უფრო მეტ ფუნქციურ დატვირთვაზე საუბრობენ.

საზღვაო ტრანსპორტის სააგენტოსა და ეკონომიკის სამინისტროს აქტიური მხარდაჭერის შედეგად გაუმჯობესებულ მაჩვენებლებზე საუბრობენ ბათუმის პორტის წარმომადგენლები. ამბობენ, რომ ტერმინალებს დღეს გაცილებით მასშტაბური რაოდენობის ტვირთის მიღება შეუძლიათ, რადგან ნავსადგურის მოდერნიზებამ დიდი გემების შემოსვლა გახადა შესაძლებელი. 2026 წელს ბათუმის ნავსადგურის საკონტეინერო ტვირთბრუნვა 14 პროცენტით უკვე გაიზარდა.

პორტის დაღრმავების სამუშაოების მნიშვნელოვანმა ზრდამ გაზარდა ფოთის ნავსადგურის დატვირთვაც. ინვესტიციები და დაინტერესება ცენტრალური აზიის ქვეყნებიდან, საოპერაციო პრაქტიკის გამარტივება და თანამედროვე სტანდარტები, ეს ის ძირითადი ფაქტორებია, რამაც ტვირთბრუნვა ფოთის პორტშიც საგრძნობლად მასშტაბური გახადა. ევროპისა და აზიის დამაკავშირებელი შუა დერეფნის ფუნქცია საქართველოს ნავსადგურებს, პორტის წარმომადგენლების თქმით, სრულიად ახალ პერსპექტივას უჩენს, რაც ქვეყნის ეკონომიკური სტაბილურობის ფუნდამენტად შეიძლება იქცეს.

ეკონომიკის სამინისტრო საქართველოს საზღვაო სექტორის სამომავლო განვითარებას სახელმწიფოსა და კერძო სექტორის მჭიდრო პარტნიორობას უკავშირებს, რაც საერთაშორისო სავაჭრო ნაკადების კიდევ უფრო ეფექტიანი მომსახურების წინაპირობად უნდა იქცეს.