ჯერჯერობით გრილი ზაფხულია, თუმცა სინოპტიკოსები ამინდის სხვაგვარ ცვლილებას ელიან. გარემოს ეროვნული სააგენტოს ჰიდრომეტეოროლოგიის დეპარტამენტის გრძელვადიანი პროგნოზების განყოფილების უფროსი ხათუნა­ ქოქოსაძე ამბობს, რომ წელს ნორმაზე ცხელი ზაფხული იქნება და ცხელი დღეების პერიოდი შემოდგომისკენაც გადაინაცვლებს:

„ჩვენთანაც და აღმოსავლეთ ევროპის ქვეყნებშიც ყველგან ცხელ ზაფხულს ელიან. წელს ზაფხულის საშუალო ტემპერატურა 1-2 გრადუსით მაღალი იქნება. 

ახლა ცხელმა პერიოდმა უფრო გადაინაცვლა და აგვისტოა ყველაზე ცხელი. ასე გრძელდება სექტემბრის დასაწყისშიც. ბოლო­ წლებში ზაფხულის მაქსიმალური ტემპერატურა აგვისტოს ბოლოს ან სექტემბრის დასაწყისში დაფიქსირებულა - 40-41 გრადუსი, რაც წინა, 30-წლიანი პერიოდისთვის იშვიათობა იყო. ამდენად კლიმატის ცვლილება საქართველოზეც გავლენას ახდენს, კლიმატური ნორმა უფრო დათბობისკენ მიდის. ზაფხულის ძალიან ცხელი­ პერიოდები გახშირდა. გვაქვს ახალი მაქსიმუმების ე.წ. რეკორდი, ან შეიძლება ახალი მაქსიმუმი არ დაფიქსირდეს, მაგრამ მაღალი ტემპერატურის პერიოდი იყოს ჩვეულზე ხანგრძლივი.

40-41 გრადუსი საკმაოდ მაღალი ტემპერატურაა და არაერთხელ დაფიქსირებულა თბილისში, მაგრამ ეს რეკორდი არ არის. თბილისის რეკორდია 42-43 გრადუსი. წელს მოიხსნება თუ არა რეკორდი, არ ვიცით, მაგრამ ცხელი დღეები რომ ხშირი იქნება, სავსებით მოსალოდნელია.

ბოლო დროს აგვისტო ყველაზე ცხელ პერიოდად ფიქსირდება და ცხელი პერიოდი სექტემბრის დამდეგსაც გადაჰყვება ხოლმე, - განუცხადა "კვირის პალიტრას" ხათუნა ქოქოსაძემ.

სტატიების ნახვა შეგიძლიათ რუბრიკაში "ყველა სტატია"

ყველა ახალი ამბის ნახვა შეგიძლიათ ამ ბმულზე

საინტერესო ვიდეოები შეგიძლიათ იხილოთ რუბრიკაში "ყველა ვიდეო"

ბოლო ამბების ნახვა შეგიძლიათ ამ ბმულზე