სახელი*
    ელ–ფოსტა
    წერილის ტექსტი*
    საკონტროლო კოდი* კოდის განახლება
    გაგზავნა
    ნინი ქეთელაური
    16.05.2018

     "6 წლის განმავლობაში აბსოლუტურად მოდუნებული ჯგუფები ნელ-ნელა იწყებენ აქტიური პროტესტის რეჟიმში გადასვლას, რაც ხელისუფლებას უნდა კარნახობდეს, რომ სახელმწიფო სისტემები არ არის იმ დონის, როგორიც უნდა იყოს," - აცხადებს ანალიტიკოსი არჩილ გამზარდია, რომელსაც "რეზონანსი" ქვეყანაში მიმდინარე მოვლენებზე გაესაუბრა.

    "რეზონანსი": თქვენი აზრით, პარასკევს განხორციელებული სპეცოპერაცია სცდება თუ არა სამართლებრივ სივრცეს?

    არჩილ გამზარდია: რადგანაც სპეცოპერაციის ნებართვა სასამართლოს მიერ იყო გაცემული, ე.ი. ის იყო ლეგიტიმური. იყო თუ არა კლუბებში შესვლა სწორი, ეს უკვე არის სასამართლო გადაწყვეტილებაზე დავა, თუ რის საფუძველზე მოხდა ეს, რაც გამჭვირვალე ნამდვილად არ არის. ჩვენთვის ფაქტი ის რის, რომ ეს ყველაფერი კანონის ჩარჩოში იყო ჩასმული.

    "რ": როგორ შეაფასებდით შემდეგ განვითრებულ მოვლენებს, ეს იყო იმ ადამინების გულწრფელი თუ ვინმეს მიერ მართული პროცესი?

    ა.გ: პრინციპში, პროტესტის საფუძველი ჩანს. თუმცა, თუ გავითვალისწინებთ, რომ აქცია დაიწყო შეჭრის ფორმების გაპროტესტებით, მერე გადაიზარდა პოლიტიკურ მოთხოვნებში და საბოლოოდ დასრულდა ნარკოპოლიტიკის გადახედვის დაპირებით, ეს ყველაფერი ერთმანეთში არ ჯდება. შებამისად, ეს ქმნის განცდას, რომ პროცესი საწყის ეტაპზე თუ არა, შემდეგ მაინც გარკვეული იტერესთა ჯგუფებისგან იყო მართვადი.

    "რ": რას იტყოდით "ქართული მარშის" გამოჩენაზე, ეს იყო მათი სპონტანური გადაწყვეტილება თუ ასევე ვინმეს მიერ მართული?

    ა.გ: ნებისმიერი ორგანიზებული პროტესტი ვიღაცის მიერაა მართვადი. ამიტომ, მე თუ ვსაუბრობ, რომ ერთი აქცია დიდი ალბათობით იყო მართული, მეორე აქციაზეც ანალოგიურის თქმა შემიძლია. ცხადია, პირველ შემთხვევაშიც და მეორეშიც, იყო ადამიანთა დიდი ნაწილი, ვინც გულწრფელად ფიქრობდა იმას, რასაც გამოხატავდა.

    "რ": ვის მიერ იყო მართული? მაშინვე გაჩნდა მოსაზრება, რომ "ქართული მარში" აქციის მონაწილეების დასაშინებლად ხელისუფლებამ გამოიყვანა. თქვენშიც ჩნდება ეს ეჭვი?

    ა.გ: ჩვენთან ხელისუფლება არ წამოადგენს ერთ მთლიანობას. აქაც არის შიდადინებები, სადაც ძალაუფლების მსურველ ჯგუფებს შორის არის გარკვეული ბრძოლა. შესაბამისად, თეორიულად ეს ნამდვილად შესაძლებელია, თუმცა, ნურც იმას გამოვრიცხავთ, რომ საზოგადოების ნაწილს რაღაც პროცესის მიმართ მიუღებლობის განცდა ჰქონდეს. თუ კონტრაქცია საკუთარ პროტესტს მისაღები ფორმებით გამოტახავს, ეს ლოგიკურია. თუმცა, თუ ის ძალადობისკენაა მიდრეკილი, ეს თავისთავად აჩენს ეჭვს და ჩვენთან ასეთ კონტრაქციებს ყოველთვის ასდის პოლიტიკური სურნელი.

    "რ": თქვენი აზრით, რომ არა მინისტრის ბოდიში და აქციის დაშლა, სიტუაცია გართულდებოდა? აქციის მონაწილეთა გარკვეული ნაწილი ამბობდა, რომ ამის საშიშროება არ არსებობდა და მოტყუებულად გრძნობდა თავს...

    ა.გ: ფაქტია, რომ იქ შეიქმნა კრისიზისი, რისი განეიტრალებაც მინისტრმა მოახერხა. რა მიზნები ჰქონდა მას და ეს შეესაბამებოდა თუ არა აქციის მონაწილეთა ინტერესებს, ეს სხვა საკითხია. ჩემი აზრით, ეს იყო ანთებითი პროცესის ჩაქრობის კარგი გამოსავალი.

    თუ ვიღაც ცდილობდა, ეს აალებული პროცესი გამოეყენებინა და მერე კოვზი ნაცარში ჩაუვარდა, ამით უკვე მათი სუბიექტური ინტერესები იკვეთება.

    "რ": როგორ ფიქრობთ, ამით დაპირისპირება ამოიწურა? შეგახსენებთ, რომ წინ 17 მაისია..

    ა.გ: ამ ქვეყანაში დაპირისპირების საფრთხე არასდროსაა ამოწურული, მით უმეტეს - ახლა. ამ წლების განმავლობაში, მოქალაქეებში არსებულმა მშვიდმა განწყობებმა სხვა შინაარსი შეიძინა და უკვე დაძაბულობის, ნეგატივის მუხტი გამძაფრდა. საზოგადოებაში განჩნდა განცდა, რომ პროტესტით შეიძლება გარკვეული მიზნების მიღწევა. ამიტომ, ამ ეტაპზე ჩამქრალი დემოკრატიული პროტესტი ამის მერე უკვე ასე ადვილად ვეღარ ჩამთავრდება.

    ცალსახაა, რომ პროტესტი სხვადასხვა დროს, განსხვავებული ფორმით იჩენს თავს და რა შემთხვევში იქნება რაიმე პროცესის გადამწყვეტი, ეს რთული სათქმელია.

    6 წლის განმავლობაში აბსოლუტურად მოდუნებული ჯგუფები ნელ-ნელა იწყებენ აქტიური პროტესტის რეჟიმში გადასვლას, რაც ხელისუფლებას უნდა კარნახობდეს, რომ სახელმწიფო სისტემები არ არის იმ დონის, როგორიც უნდა იყოს. ვგულისხმობ იმ პროტესტს, რომელიც ფეთქებადსაშიშია, თორემ კონკრეტული პროტესტის მოტივაცია შეიძლება, ყოველთვის არსებობდეს და ეს სახელმწიფოს განვითარებისთვისაც საინტერესო იყოს.

    ახლა უკვე ლოგიკურია, თუ არსებობს კითხვა, როგორ ჩაივლის 17 მაისი. მით უმეტს, რომ, დედაქალაქის გეოგრაფიული აგებულებიდან გამომდინარე, ზედმეტად მეზობლურ სივრცეებში უნდა ჩატარდეს სოციალური აქტივობები. აქ პრობლემაა ის, რომ პროტესტის დემოკრატიულ ჩარჩოში ჩატარების მზაობა ქვეყანაში ნაკლებია. ამიტომ, ძალოვანებს ეკისრებთ განსაკუთრებული პასუხისმგებლობა, რომ მოახერხონ აქციების დისტანცირება და სტაბილურობის უზრუნველოყოფა. რამდენად მოახერხებენ, ეს უკვე სხვა საქმეა და ამას ვნახავთ.

    "რ": ნარკოპოლიტიკის გადახედვა იგეგმება, თუმცა მმართველ გუნდში კვლავ რადიკალური პოზიციებია. რა გამოსავალი შეიძლება, მონახოს ხელისუფლებამ?

    ა.გ: მთელი დილემა სწორედ ისაა, რომ აქ არის ურთიერთგამომრიცხავი პოზიციები, რის გამოც ხელისუფლებაშიც კი ვერ თანხმდებიან. არ ხდება პრობლემის სიღრმისეული შესწავლა და პროცესი პოზიციების დაფიქსირების იქით არ მიდის. სამწუხაროდ, ჩვენთან არ მუშაობს თანამედროვე მეცნიერება, რომ კონკრეტული მოვლენები საფუძვლიანად შეისწავლოს.

    შედაგად გამოსავლის ძიება ხდება მხოლოდ ექსპერტის, პოლიტიკოსების ან დაინტერესებული ჯგუფების მიერ, რაც თავისთავად არასწორია. ეს იმას ნიშნავს, რომ კვლავ გარკვეული იმიტირებული "წინსვლა" იქნება, ისეთი, როგორიც იყო შრომის კოდექსთან დაკავშირებით, რომელიც რეალისტური არ არის, ან რომელიღაც მხარისთვის სასურველი, მაგრამ არაობიექტურ გარემოებებზე დაფუძნებული გადაწყვეტილება მიიღება. ხელისუფლება რომლისკენ გადაიხრება, ეს ჩემთვის უცნობია.

    თუმცა, იმის გათვალისწინებით, რომ არ ხდება ამის სიღრმისეული შესწავლა, ნებისმიერი გადაწყვეტა მაინც ისევ პრობლემის სახით იჩენს თავს.

    "რ": პარსკევს დაწყებულმა მოვლენებმა სრულად გადაფარა ბიძინა ივანიშვილის პოლიტიკაში დაბრუნება. როგორ ფიქრობთ, მისი დაბრუნების გაგრძლება იქნება თუ არა სამთავრობო ცვლილებები?

    ა.გ: ივანიშვილის გამოსვლაში რასაც მოვუსმინეთ, ამის ეჭვი არ ჩნდება. თუმცა თუ განვითარებულმა მოვლენებმა მოითხოვა, ვერც ამას გამოვრიცხავ. მე მაინც ვფიქრობ, რომ როგორც კი ეს აქტიური მოვლენები ჩამთავრდება, ისევ მასზე კონცენტრირდება პროცესები და მის მიმართ გაჩნდება მოლოდინი. თუმცა მას არ აქვს იმდენი დრო, რომ მოსახლეობაში ეს ნდობა ასწიოს. ვფიქრობ, შესაძლოა, მის მიმართ ნდობა კიდევ უფრო დაბლა დაეცეს, რის შემდეგაც უკვე ახალ პოლიტიკურ ეტაპზე გადასვლა გარდაუვალი გახდება.

    ლიცენზია
    დატოვე კომენტარიკომენტარები (0)
    ჩაწერა სახელი

    Copyright © 2006-2018 by Resonance ltd. . All rights reserved