"როგორ იქნება მოთხოვნა, როდესაც ყველაფერი დაკეტილია და არაფერი მუშაობს? ცუდი სიტუაციაა და უახლოეს პერიოდში არც გამოსწორდება“
გვანცა წულაია
21.01.2021

უძრავი ქონების ბაზარზე ცუდი მდგომარეობაა. ვითარება განსაკუთრებით მას დამძიმდა, რაც ქვეყანაში შეზღუდვების მეორე ეტაპი ამოქმედდა და იპოთეკური სესხების სუბსიდირების პროგრამა დასრულდა. ბინების ყიდვა-გაყიდვის მხრივ ახალი წლის შემდეგ მოთხოვნა, ფაქტობრივად, გაქრა. 

ქვეყანაში კორონავირუსის გამოვლენის შემდეგ, უძრავი ქონების ბაზარმა უკუსვლა დაიწყო, რომელიც დღემდე გრძელდება. იპოთეკური სესხების სუბსიდირებამ, სიტუაცია ცოტათი შეცვალა, მაგრამ სანაცვლოდ, მკვეთრად უარყოფითი გავლენა მოახდინა მეორე ლოქდაუნმა და წლის ბოლოს იპოთეკური სესხების სუბსიდირების პროგრამის დასრულებამ.

როგორც ბაზრის ექსპერტი, სააგენტო ,,კიბეს“ ხელმძღვანელი ნელი გოგუაძე აცხადებს, უძრავი ქონების ბაზარზე რთული მდგომარეობაა და ბინების ყიდვა-გაყიდვის ბიზნესში მოთხოვნა თითქმის გამქრალია. 

„ბინების რეალიზაცია ძალიან შემცირებულია, განსაკუთრებით მეორადი ბინების. შარშანდელმა სუბსიდირების პროგრამამ უძრავი ქონების ბაზარზე დადებითად იმოქმედა, მაგრამ მისი დასრულების შემდეგ, აშკარად ცუდი ვითარებაა. წელს, და ნორმალური მოთხოვნა ჯერჯერობით არ ყოფლა. 

ბინების გაქირავების მხრივაც ანალოგიური მდგომარეობაა. პრინციპში, როგორ იქნება მოთხოვნა, როდესაც ყველაფერი დაკეტილია და არაფერი მუშაობს? მოკლედ რომ ვთქვა, ორივე მხრივ ცუდი სიტუაციაა და უახლოეს პერიოდში არც გამოსწორდება“, - განუცხადა „რეზონანსს“ ნელი გოგუაძემ. 

სუბსიდირების პროგრამის შედეგად, 2020 წლის მეორე ნახევარში, წინა წლის შესაბამის პერიოდთან შედარებით, ახალაშენებული ბინების ბაზარი 13%-ით გაუმჯობესდა, თუმცა ეს მდგომარეობა შეიცვალება, რადგან პროგრამა თვეზე მეტია დასრულდა და შეზღუდვები კი ისევ გრძელდება, რაც ნებისმიერი ეკონომკურ საქმიანობის განვითარებას ხელს უშლის. 

Colliers International Georgia-ს მიერ მომზადებულ კვლევაში აღნიშნულია, რომ თბილისში ახალაშენებული ბინების რაოდენობა წინა წელთან შედარებით 14%-ით ნაკლებია, ხოლო ძველ ბინებზე რეგისტრირებული ტრანზაქციების რიცხვი 26%-ით შემცირდა და 8 593 ერთეული შეადგინა. ჯამურად კი ახალ და ძველ ბინებზე რეგისტრირებული ტრანზაქციების რაოდენობა 18%-ით შემცირდა.

2020 წელს ახალაშენებული ბინების ბაზრის ღირებულება, შარშანდელთან შედარებით, 20%-ით შემცირდა და 849 მილიონი აშშ დოლარი შეადგინა, ხოლო ძველი აშენებული ბინების შემთხვევაში 27%-იანი კლება დაფიქსირდა და ბაზრის ღირებულება 342 მილიონი აშშ დოლარი იყო.

2020 წელს ახალაშენებული ბინების მედიუმ და პრემიუმ სეგმენტები წინა წლის მაჩვენებელს 43% და 40%-ით ჩამორჩებიან. რაც შეეხება ეკონომ სეგმენტს, ტრანზაქციების რაოდენობა მხოლოდ 4%-ით შემცირდა. აქვე აღსანიშნავია, რომ გასულ წელს ახალაშენებულ ბინებზე რეგისტრირებული ტრანზაქციების რაოდენობა მნიშვნელოვნად შემცირდა თბილისის უბნების უმეტეს ნაწილში. მცირედი კლება დაფიქსირდა სამგორში, ნაძალადევსა და დიდუბეში, 2%, 1% და 6%. გამონაკლისს წარმოადგენდა გლდანი, სადაც ტრანზაქციების რაოდენობა 38%-ით გაიზარდა.

რაც შეეხება ფასებს, კვლევაში აღნიშნულია, რომ 2020 წელს ახალაშენებული ბინების საშუალო შეწონილი გასაყიდი ფასი, წინა წელთან შედარებით, 5%-ით შემცირდა და 1 კვ/მ-ზე 672 აშშ დოლარი შეადგინა. რაც შეეხება ძველ აშენებულ ბინებს, საშუალო შეწონილი გასაყიდი ფასი უმნიშვნელოდ, 1 კვ/მ-ზე მხოლოდ 3 დოლარით (დაახლოებით 1%-ით) დაიკლო და 638 აშშ დოლარი შეადგინა.

2020 წელს, ახალაშენებული ბინების საშუალო შეწონილი გასაყიდი ფასი საბურთალოზე, ფონაჭალასა და ბაგებში შემცირდა 10%, 9% და 4%-ით. წყნეთში, მთაწმინდაზე, გლდანსა და ნაძალადევში კი გაიზარდა 14%, 9% და 7-7%-ით. უნდა აღინიშნოს, რომ ფონიჭალასა და წყნეთში ახალაშენებული ბინების ბაზარი ნაკლებად აქტიურია. რაც შეეხება ძველი აშენებული ბინების ფასებს, გასაყიდი ფასი ყველაზე მეტად კრწანისში, წყნეთსა, და ისანში გაიზარდა, 14%, 13% და 7%. კრწანისსა და ისანში ფასის ზრდა შესაძლოა დაკავშირებული იყოს ისეთ ძველ/ძვირადღირებულ უბნებთან, როგორიცაა აბანოთუბანი და ავლაბარი. ფასის მცირედი კლება დაფიქსირდა ვაკეში, მთაწმინდაზე, ჩუღურეთსა და დიდუბეში.

კომპანია "სიგმას" დირექტორი ზურაბ ლაჩაშვილი ერთ-ერთი მათგანია, რომელიც ადასტურებს, რომ ბინების ყიდვა-გაყიდვამ იკლო.

„ბუნებრივია, რომ ბინების ყიდვა-გაყიდის პროცესი შემცირებულია. ვერ გეტყვით, კლება რამდენი პროცენტით მოხდა, რადგან ამას კვლევის ჩატარება სჭირდება, რომლის საშუალება ჩვენ არ გვაქვს. ეს მოითხოვს საკმაოდ დიდ თანხებს. გარდა იმისა, რომ მოსახლეობას ფული არ აქვს, კორონავირუსის გამო, ხალხი ერთმანეთთან მისვლას ერიდება. ამიტომ, ყველა ცდილობს, დაიცადოს, ვითარება დამშვიდდეს და შემდეგ, გააგრძელონ უძრავი ქონების ყიდვა-გაყიდვა“, - აღნიშნა ლაჩაშვილმა „რეზონანსთან“. 

სხვა რესპონდენტებისგან განსხვავებული პოზიცია აქვს კომპანია „ბერუკას“ დირექტორს ავთანდილ გუგეშაშვილს, რომელიც ამბობს, რომ ყიდვა-გაყიდვის ბაზარი თითქოს გამოცოცხლდა, რაც თავის დროზე სწორედ იპოთეკური სესხების სუბსიდირებამ განაპირობა. 

„ყიდვა-გაყიდვის ბაზარი თითქოს ამოძრავდა, გამოცოცხლდა. ალბათ, ეს სუბსიდირების პროგრამის უკავშირდება. ამჟამად უძრავი ქონების ბარაზრზე არსებულ მდგომარეობას ცუდსაც ვერ დავარქმევდი, ცოტათი გამოცოცხლება ნამდვილად შეიმჩნევა“, - განუცხადა ავთანდილ გუგეშაშვილმა „რეზონანსს“. 

უძრავი ქონების ბაზარზე არსებული არასახარბიელო ტენდენცია, დიდი ალბათობით, ჯერ კიდევ გასტანს, რადგან კრიზისული ვითარების დროს, მოსახლეობას შემოსავლები გაუქრა და ახლა ბინის შეძენას ვერავინ ვერ ახერხებს. თანაც, უცხო ქვეყნის მოქალაქეები ვეღარ შემოდიან, რომლებიც საქართველოში ბინებს ყიდულობდნენ და ახლა უძრავი ქონების ბაზარზს შემოსავალი ამ მხრივაც გაუქრა.

სტატიების ნახვა შეგიძლიათ რუბრიკაში "ყველა სტატია"

ყველა ახალი ამბის ნახვა შეგიძლიათ ამ ბმულზე

საინტერესო ვიდეოები შეგიძლიათ იხილოთ რუბრიკაში "ყველა ვიდეო"

ბოლო ამბების ნახვა შეგიძლიათ ამ ბმულზე

ლიცენზია
დატოვე კომენტარიკომენტარები (1)
ჩაწერა სახელი
ივანე   (24.01.2021)
გაიყინა კი არა დედა ეტირება საერთოთ ბიზნეს.... პალესტინაში ხო გიბახიათ ქვის სროლია ხალხი ზუსტად მაქეთ მივდივართ......


Copyright © 2006-2021 by Resonance ltd. . All rights reserved
×

sesionArray ( [s_logi] => rezoni_index )
cookieArray ( )