დედაქალაქში ბინებზე კვლავ არანორმალურად მაღალი ფასი ნარჩუნდება. ეს ხდება მაშინ, როცა უძრავ ქონებაზე მოთხოვნამ იკლო და რეალიზაცია შემცირებულია. ბინების გაძვირების მთავარი მიზეზი სამშენებლო მასალების სიძვირეა. „რეზონანსი” შეეცადა გაერკვია რატომ არის ბაზარზე ასეთი არარეალური მდგომარეობა და რამ შეიძლება დაარეგულიროს სიტუაცია.

ბაზარზე მოთხოვნა პირდაპირ მოქმედებს ფასის ზრდაზე, ახლა კი საპირისპირო ვითარებაა. თბილისში 2023 წლის პირველ 6 თვეში უძრავი ქონების გაყიდვა შემცირდა, ფასი კი მაინც გაიზარდა. ამის პირველ მიზეზად გაძვირებული სამშენებლო მასალები სახელდება, თუმცა გასათვალისწინებელია ის გარემოებაც, რომ არა მხოლოდ ახალ აშენებულ ბინებზე გაიზარდა ფასი, არამედ ძველი უძრავი ქონების ფასიც საგრძნობლად მომატებულია, რომელსაც სამშენებლო მასალები არ სჭირდება.

სტატისტიკური მონაცემებიდან ირკვევა, რომ 2023 წლის პირველ ნახევარში თბილისში 20 026 ბინა გაიყიდა, რაც წინა წლის პირველ ნახევართან შედარებით, 2%-ითაა შემცირებული.

თბილისში ახალ პროექტებში ტრანზაქციების 0.4%-იანი კლებაა. ძველ პროექტებში კი, 2022 წლის პირველ ნახევართან შედარებით, მაჩვენებელი 6%-ით შემცირდა.

რაც შეეხება ღირებულებას, წლის პირველ ნახევარში, თბილისში ძველი ბინების შემთხვევაში, საშუალო შეწონილი გასაყიდი ფასი 6%-ით გაიზარდა გარეუბნებში და ქალაქის ცენტრში, ფართო ცენტრში კი 3%-იანი ზრდა დაფიქსირდა.

ახალაშენებული ბინების შემთხვევაში საშუალო შეწონილი გასაყიდი ფასმა 9%-ით მოიმატა გარეუბნებში და ფართო ცენტრში, ქალაქის ცენტრში კი 7%-იანი სხვაობა აღინიშნა.

უძრავი ქონების ეროვნული ასოციაციის პრეზიდენტის ვაჟა მებაღიშვილის შეფასებით, ამ სტიუაციიდან გამოსავალი არის ის, რომ დეველოპერებმა გადახედონ არსებულ შემთხვევებს და თუკი შესაძლებელი იქნება ღირებულება დასწიონ.

„ის, რაც ახლა ბაზარზე ხდება, საკმაოდ შეუთავსებელი მდგომარეობაა. გაზრდილი ფასის გამო, მყიდველი უკვე თავს იკავებს უძრავი ქონების შეძენისგან, რაც თავისთავად მოქმედებს რეალიზაციაზე. იმავდროულად, ბაზარზე მომატებულია სამშენებლო მასალების ღირებულება, რაც აძვირებს უკვე დასრულებული ბინების ფასს.

პრემიუმ კლასის ქონება, რაც ჩვენს ქალაქშია წარმოდენილი, საკმაოდ მოთხოვნადია და ამ მხრივ კონკურენციაც მაღალია. მინახავს რამდენიმე მყიდველი ერთი და იგივე ქონებაზე, რომლებიც კონკურენციაშიც შესულან. ეს არის საერთო ფონი.

თუკი ეკონომ კლასის ბინები გაძვირდა, მყიდველიც თავს იკავებს შეძენისგან და დაელოდება უკეთეს მომენტს, როცა ფასი დასტაბილურდება. გამოსავალი არის ის, რომ დეველოპერებმა გადახედონ არსებულ, რიგ შემთხვევებს და საშუალების შემთხვევაში, დასწიონ ფასი.

აღსანიშნავია ისიც, რომ თვითონ მშენებლებსაც საკმაოდ ძვირი უჯდებათ მასალების შეძენა. ეს პროცესი საკმაოდ რთული და ხანგრძლივია, ამიტომაც არის საქართველოს ბაზარზე უძრავი ქონება ძვირი. ამას აღნიშნავენ არა მხოლოდ ადგილობრივი მომხმარებლები, არამედ ჩვენი უცხოელი საერთაშორისო ინვესტორებიც კი, რომ ფასი საკმაოდ მაღალია და უტოლდება ევროპის მოწინავე ქვეყნებს“, - აღნიშნა მებაღიშვილმა „რეზონანსთან“ საუბრისას.

მიუხედავად იმისა, რომ სამშენებლო მასალების გაძვირება წელს აღარ შეინიშნება, ფასი მაინც იმატებს. ჯერჯერობით სამომავლოდ არ იკვეთება გაიაფების ნიშნები და მიუხედავად იმისა, რომ მოთხოვნაც შემცირებულია, ფასის ზრდის ტრენდს მაინც ყველა ჯიუტად მიჰყვება.

როგორც სამშენებლო დარგის წარმომადგენელი, კომპანია „ბერუკას" ხელმძღვანელი ავთანდილ გუგეშაშვილი აღნიშნავს, პრობლემის მოგვარება მშენებლების ერთმანეთთან შეთანხმებით არის შესაძლებელი.

„ბაზარზე უძრავი ქონების ღირებულება მართლაც უცნაურად მომატებულია. მშენებლებმა ძალიან გააძვირეს თავიანთი პროდუქტი, რაც მოქმედებს კონკურენციაზე. ერთმანეთში უნდა დარეგულირდეს ფასები და თუ ეს არ გააკეთეს, არაფერი შეიცვლება. თვითღირებულების ზრდაზე ძალიან მოქმედებს სამშენებლო მასალების სიძვირეც, რაც ძალაუნებურად ცვლის ბაზარზე სიტუაციას.

მაღალი ღირებულება, არა მხოლოდ ახალ აშენებულ ბინებზეა, ასევეა ძველ კორპუსებზეც. ეს იმიტომ ხდება, რომ ახალ აშენებულ უძრავ ქონებას გაუწიოს კონკურენცია "ძველმა" და გამყიდველმა შეძლოს უძრავი ქონების მისთვის ხელსაყრელად რეალიზაცია“, - აღნიშნა გუგეშაშვილმა „რეზონანსთან“ საუბრისას.

"ქოლიერს ჯორჯიას" განახლებული მიმოხილვაში ასევე აღნიშნულია ივნისში დედაქალაქში ბინების გაყიდვის მაჩვენებელმა მხოლოდ 1%-ით მოიმატა და 3846 ერთეული შეადგინა. ბაზრის ზომა კი 210 მილიონ დოლარამდეა გაზრდილი.

2023 წლის ივნისში ახალ პროექტებში რეალიზაციის 9%-იანი ზრდაა, ძველ პროექტებში კი 2022 წლის ივნისთან შედარებით მაჩვენებელი 13%-ით შემცირდა.

ივნისში, თბილისში ახალაშენებული ბინების საშუალო შეწონილი გასაყიდი ფასი გარეუბნებში 6%-ით გაიზარდა, ფართო ცენტრში - 1%-ით, ქალაქის ცენტრში კი - 9%-ით.

ამავე მიმოხილვით ირკვევა, რომ ივნისში თბილისის გარეუბნებში ძველი ბინების საშუალო შეწონილი გასაყიდი ფასი 4%-ით გაიზარდა, ფართო ცენტრსა და ქალაქის ცენტრში კი 7%-იანი მატება დაფიქსირდა.