უძრავი ქონების ბაზარზე ქაოსური სიტუაცია ეტაპობრივად წესრიგდება და ვითარება ნელ-ნელა სტაბილიზაციისკენ მიდის. მიმდინარე ეტაპზე მოთხოვნა თანდათან მცირდება და ბინების ყიდვა-გაყიდვის კუთხით ფასიც ნელ-ნელა იკლებს, მაგრამ ღირებულება ჯერჯერობით მაინც მაღალ ნიშნულზეა.

უკვე რამდენიმე თვეა, ბინების რეალიზაციის მიმართულებით მოთხოვნამ იკლო, შესაბამისად შემცირებულია გაყიდვის მაჩვენებელიც, მაგრამ მიუხედავად ასეთი მოცემულობისა, მაღალი ფასი ისევ რჩება, თუმცა აღსანიშნავია ისიც, რომ ღირებულება ნელ-ნელა მცირდება და თუკი მოცემულობა უარესებისკენ არ შეიცვლება, გაძვირების ტენდენცია წარსულ ჩაბარდება და ვითარება გაიაფებისკენ შებრუნდება.

ბიზნესში არსებულ მოცემულობაზე ისაუბრა უძრავი ქონების სააგენტოს „სიგმას“ დირექტორმა ზურაბ ლაჩაშვილმა და დაადასტურა, რომ ფასის კლების ტენდენცია ნამდვილად შეინჩნევა, მაგრამ ეს სწრაფად მაინც ვერ მოხდება.

„ქაოსური სიტუაცია ბოლომდე არ არის ჩამცხრალი, მაგრამ გარკვეული სტაბილიზაცია შეინიშნება. ფასების შემცირების ტენდენცია ნამდვილად გვაქვს სახეზე, მაგრამ ეს პროცესი ასე უცებ არ გვარდება, ამას გარკვეული პერიოდი სჭირდება“, - განუცხადა „რეზონანსს“ ზურაბ ლაჩაშვილმა და ხაზი გაუსვა, რომ მოთხოვნა შემცირებულია, ამიტომ მომავალ თვეებში ღირებულების კლებაა მოსალოდნელი.

„თუ რაიმე გაუთვლელი სიტუაცია ან მოულოდნელი ფაქტორი არ მივიღეთ, მაშინ სტაბილიცაზია უფრო მეტად გვექნება. საერთოდ, ფასების ჩამოყალიბებას გარკვეული პერიოდი სჭირდება. ახლა დიდი მოთხოვნა აღარ არის და შესაბამისად, ახლო მომავალში ფასებიც დარეგულირდება. ზოგი ღირებულებას უფრო მეტად დააკლებს, ზოგი - უფრო ნაკლებად“, - განუცხადა „ბიზნეს-რეზონანსს“ ზურაბ ლაჩაშვილმა.

ცოტა ხნის წინ ახალი სასწავლო წლის დაწყების ციებ-ცხელება იყო ქვეყანაში და ირკვევა, რომ ამ პერიოდში ბინების შეძენაზე მოთხოვნა არ გაზრდილა. მოთხოვნა მომატებული იყო მხოლოდ და მხოლოდ ქირის ნაწილში და თანაც არა იმდენად, რომ ამ ფაქტორს ბაზრის ბოლოდროინდელ ტენდენციაზე მოეხდინა.

„სასწავლო წლის დაწყების პერიოდი, როგორც წესი, ბინების გიყვა-გაყიდვის მიმართულებაზე არ მოქმედებს, რადგან ეს ფინანსური ბაზრის მხარე არ არის. ამიტომ სექტემბერ-ოქტომბერი არასოდეს ახდენს გავლენას უძრავი ამ კუთხით და არც არასოდეს იმოქმედებს“, - აღნიშნა ლაჩაშვილმა.

ბიზნესის წარმომადგენელთა ნაწილი აცხადებს, რომ უძრავი ქონების მიმართულებით ჯერ კიდევ ნარჩუნდება ქაოსური სიტუაცია. სწორედ ასეთი პოზიცია აქვს სამშენებლო კომპანია „ბერუკას“ ხელმძღვანელს, თუმცა ავთანდილ გუგეშაშვილი იმასაც ვარაუდობს, რომ ფასი წესით ქვევით უნდა წამოვიდეს.

„მიმდინარე ეტაპზე ისევ არასტაბილური სიტუაციაა და ჯერჯერობით ვერ ვიტყვი, რომ ბაზარზე სტაბილურობაა. მიმდინარე ეტაპზე იგივე მოცემულობაა. გაზრდილი ფასი დარჩა, მაგრამ დაინტერესება აღარ არის“, - განუცხადა „ბიზნეს-რეზონანსს“გუგეშაშვილმა და კითხვას - თუკი მოთხოვნა არ არის, ღირებულება რატომ არ იკლებს, უპასუხა, რომ: „კონკურენცია გაჩნდა, მშენებლები კონკურენტუნარიანები გახდნენ. წესით, სამომავლოდ, ფასი წესით ქვევით უნდა წამოვიდეს, დაველოდოთ რა იქნება“, - დასძინა ავთანდილ გუგეშაშვილმა.

საქართველოს უძრავი ქონების ბაზარზე მოცემულობა უკრაინაში ომის დაწყების შემდეგ შეიცვალა. მიგრანტების ორმა ნაკადმა  ქვეყანაში ბინებზე მოთხოვნა გაიზარდა, რასაც ავტომატურად მოჰყვა არანორმალური გაძვირება. მას შემდეგ მოცემულობა შეიცვალა და ახლა სიტუაცია ნელ-ნელა ლაგდება, თუმცა იმ დროს შეძენილ ბინებს მიგრანტები ახლა რეალიზაციაში უშვეებნ: ზოგი ყიდის, ზოგიც აქირავებს.

სწორედ ასეთ მოცემუობაზე ისაუბრა „აიჯიეს“ ჯგუფის დამფუძნებელმა, უძრავი ქონების სფეროს სპეციალისტმა შოთა გუჯაბიძემ და ასევე განაცხადა, რომ ის ბუმი, რომელიც ტურისტული, თუ მიგრაციული ნაკადის შემოდინებას მოჰყვა, ჯერ ჩამცხრალი არ არის და გრძელდება.

„საქართველოში სხვადასხვა ბაზარი, მათ შორის უძრავი ქონების მიმართულება, არის სპონტანური, რადგან ჩვენ არ გაგვაჩნია გრძელვადიან ეკონომიკურ პერსპექტივაზე გაწერილი სტრატეგია. ეკონომიკური სტარეგიისა და სხვადასხვა რეგულაციების, თუ ნორმატივების არ არსებობის შემთხვევაში, ბაზარი არის სიმპტომური და რეაგირებს იმაზე, რაც ახლა, მიმდინარე პერიოდში ხდება და არა წინარე შექმნილ ვითარებაზე ან მომავალში მოსალოდნელ პროცესებზე.

ჩვენი ბაზარი ძალიან ადვილად პროვოცირებადია სხვადასხვა რისკის მიმართ და რა თქმა უნდა, ის ბუმი, რომელიც ტურისტული, თუ მიგრაციული ნაკადის შემოდინებას მოჰყვა, ჯერ ჩამცხრალი არ არის და გრძელდება, მაგრამ ტენდენცია უკვე გამოიკვეთა. შემოსული ნაკადის ძალიან დიდმა ნაწილმა საკმაო რაოდენობის უძრავი ქონება შეიძინა და ახლა თავად დაიწყო გადაყიდვა და გაქირავება. თვითონ გახდნენ ბაზრის მოთამაშეები და უკვე თავიანთ სტრატეგიას ქმნიან. სოციალურ ქსელებში, სარეკლამო და განცხადებების საიტებზე დიდი ინტენსივობით ვრცელდება, ძირითადად, სლავური ქვეყნებიდან, (ბელაურისი, უკრაინა, რუსეთი, თუმცა ევროპული ქვეყნებიდანაც არის), ვიდეორეკლამები, რომ საქართველოში სთავაზობენ უძრავ ქონებას. ტექსტები არის შემდეგი, რომ მათ შეისწავლეს ბაზარი და იციან ტენდენციები.

საერთოდ კი, სიხარბეს ცუდი შედეგი მოსდევს და სწორედ ის არის იმ სიხარბის ერთ-ერთი ეკონომიკური შედეგი, რომ მოჩვენებითად გაზრდილი ფასით ჩვენს ბაზარზე გაჩენილ სხვა ოპერატორებს და სხვის სარგებელს "ვიმკით". მათ აქ ფულის კეთება და ბაზრის ხელში დაჭერა ისწავლეს.

არარეალურად მომეტებული მოლოდინი, რაც მოსახლეობაში იყო, რომ სამმაგ ფასად გაყიდდნენ ბინებს, ეს უკვე ზღაპარია და ვითარება ნელ-ნელა სტაბილურობისკენ წავა. არ ვამბობ, რომ ღირებულება დაიკლებს და 1 კვ/მ 500 დოლარი გახდება. 500 დოლარი არც უნდა ღირდეს უძრავი ქონება, მაგრამ არც 3000 დოლარი არ უნდა ღირდეს.

სტაბილიზაციის მიღწევა ხანგძლივი და მუდმივი პროცესია, სადაც ერთი პატარა სპონტანური ეკონომიკური შოკი, ეკონომიკური პროვოკაცია საკმარისია, რომ სიტუაცია შეიცვალოს, რადგან, როგორც ვთქვი, ჩვენი ბაზარი სპონტანურია და არ არსებოს საფუძვლიანი, გრძელვადიან ეკონომიკურ სტაბილურობაზე გაწერილი ფუნდამენტი“, - განუცხადა „ბიზნეს-რეზონანსს“ გუჯაბიძემ.