საქართველო გეგმავს მედიკამენტებზე ის ზღვრული ფასი განსაზღვროს, რა ფასად უნდა მოხდეს მედიკამენტების გაყიდვა ან მათი იმპორტი. ფასები კი სხვა ქვეყნებთან შედარების საფუძველზე, კონკრეტული კრიტერიუმებით დადგინდება.
რას ნიშნავს რეფერენტული ფასები და რას გეგმავს ჯანდაცვის სამინისტრო ამ კუთხით – საკითხზე „ფორტუნას“ ეთერში ჯანდაცვის სამინისტროს სამედიცინო და ფარმაცევტული საქმიანობის რეგულირების სააგენტოს წამლის ინსპექტირების სამმართველოს ხელმძღვანელმა ისაუბრა.
ნანა შაშიაშვილის განმარტებით, რეფერენტული ფასწარმოქმნა მედიკამენტების ფასების რეგულირების ერთ-ერთი უმნიშვნელოვანესი ინსტრუმენტია, რომლის გამოყენების შედეგად შესაძლებელია, რომ მოქალაქეებისთვის სამკურნალო საშუალებები უფრო ხელმისაწვდომი გახდეს.
„შესაძლებელია დავაახლოოთ სხვა ქვეყნების ფასს და ამ მხრივ, დავზოგოთ ქვეყნის ბიუჯეტის ის ნაწილი, რაც მედიკამენტებზე იხარჯება. ასევე, დავზოგოთ მოსახლეობის მიერ მედიკამენტებზე ჯიბიდან გადახდილი თანხები. რეფერენტულ პოლიტიკას ევროკავშირის თითქმის ყველა წევრი ქვეყანა ახორციელებს, ასევე, ევროკავშირის არაწევრი ქვეყნებიც, როგორიცაა ავსტრალია, კანადა, ბრაზილია, სამხრეთ აფრიკა, იორდანია. რეფერენტულ პოლიტიკას ატარებენ ასევე, ბალტიისპირა ქვეყნები, ყაზახეთი, უკრაინა, აზერბაიჯანი, ბელორუსი, მოლდოვა. ზოგადად, ეს არის დაგეგმილი პრაქტიკა, იმისათვის, რომ მაქსიმალურად მოხდეს ხარჯების შემცირება“, – აღნიშნა ნანა შაშიაშვილმა.