80 წლის ექიმს, რომელმაც კლინიკის დირექტორს მისსავე კაბინეტში ესროლა, ორი მუხლით გაასამართლებენ. განზრახ მკვლელობის მცდელობის ბრალდებას იარაღის უკანონო შენახვა ტარება დაემატა. დავა, რომელიც ექიმსა და მის ხელმძღვანელს შორის ყოფით საკითხზე დაიწყო მძიმე დანაშაულით დასრულდა.
“კანვენში” კაბინეტი მქონდა მეოთხე სართულზე, სადაც ჩემი სახსრებით შევიძინე კონდიციონერი. სამი თვის წინ გალდვამ შემიცვალა კაბინეტი, რომელიც მსგავსი ტექნიკით აღჭურვილი არ იყო. ვთხოვე ყოფილი კაბინეტიდან გადამეტანა ჩემი კონდიციონერი, რაზეც უარი მივიღე. დირექტორი დამპირდა რომ ახალს დაამონტაჟებდნენ, რაც ასე არ მოხდა. 5 აგვისტოს გიორგი გალდავამ ჩემთან კლინიკის დაცვა გამოგზავნა, კონდიციონერის პულტი მოითხოვა და არ მივეცი. ცოტა ხანში კი, ჩემმა შვილმა, რომელიც ამავე კლინიკაში მუშაობს და გიორგი გალდავას მეგობარია, დამირეკა და მითხრა, რომ გალდავამ სამსახურიდან გამათავისუფლა. ეს ბუღალტერმაც დამიდასტურა” – ამბობს ჩვენებაში დაკავებული თეიმურაზ ბეჟანიძე.
ბრალდებული მედიკოსის ჩვენებით, სამსახურიდან გათავისუფლების შესახებ ინფორმაციის გადამოწმება, დირექტორთან პირისპირ საუბრით სცადა.
“გიორგი გალდავა კაბინეტში მარტო იყო, მოვთხოვე გაშვების მიზეზი განემარტა და ვუთხარი რომ ამის გამო პასუხს აგებდა. მან სიტყვიერი შეურაცხყოფა მომაყენა, რაზეც გავბრაზდი, იარაღი გადავტენე და გავისროლე, მისი შეშინება მინდოდა, მაგრამ ტყვია მარჯვენა მხარზე მოხვდა. ის წაიქცა, მახსოვს ყვიროდა და შველას ითხოვდა, ხმაურზე თანამშრომლები შემოვიდნენ, მე ოთახი დავტოვე. დაბლა ჩავედი და იარაღი სადღაც გადავაგდე, კონტროლი დავკარგე, ფაქტობრივად გავითიშე”, – წერს ექიმი ჩვენებაში, რომელიც “რუსთავი 2”-მა გამოაქვეყნა.