აიათოლების რეჟიმის წინააღმდეგ ბრძოლის მე-7 კვირა - ირანიდან ისევ ქალების პროტესტის ხმა ისმის. ზნეობის პოლიციის მიერ დაკავებული 22 წლის მაჰსა ამინის დაღუპვით გამოწვეული პროტესტი თეირანსა და სხვა დიდ ქალაქებში არ ცხრება და ახალ ენერგიას იკრებს. იზრდება გარდაცვლილთა რიცხვი, საპროტესტო აქციების ჩახშობისას 400-მდე ადამიანი დაიღუპა, მათ შორის არიან ბავშვები და ქალები.

თეირანი საკუთარ მოქალაქეებს დაუნდობლად ხოცავს, თუმცა ხელისუფლება აქციის მონაწილეთა მკვლელობას უარყოფს, ცივილიზებული სამყარო კი ირანელებს სოლიდარობას უცხადებს. ამერიკის შეერთებული შტატების პრეზიდენტმა უკვე დადო პირობა, რომ ირანს გაათავისუფლებს. კონკრეტულად რა იგულისხმა ბაიდენმა ამ განცხადების მიღმა ცნობილი არ არის, თუმცა ფაქტია, გეგმა არსებობს.