როგორც ჩანს, ნიკა მელია პირობას დებდა, რომ იქნებოდა მაქსიმალურად რადიკალური, დამაზიანებელი ამ ქვეყნისათვის და ზურგში დანა ჩაარტყეს, არ აცადეს, - ამის შესახებ პარტია „ქართული ოცნების" აღმასრულებელმა მდივანმა, მამუკა მდინარაძემ განაცხადა.
„მე არ ვიცი რას ნიშნავს მელიასთვის ზურგში დანის ჩარტყმა. როგორც ჩანს პირობას დებდა, რომ იქნებოდა მაქსიმალურად რადიკალური, დამაზიანებელი ამ ქვეყნისათვის და ზურგში დანა ჩაარტყეს, არ აცადეს. უფრო რადიკალური და ქვეყნისათვის დამაზიანებელი ვიღაც შეიძლება იყოს და უფრო კარგად განკარგოს ის ფული, რომელიც ოლიგარქების მიერ პარტიისკენ და მათი მედიებისაკენ მიემართება. რაც უნდა ის უქნიათ ერთმანეთისათვის, ქვეყანა არ დააზიანონ მთავარია",- აღნიშნა მდინარაძემ.
„ნაციონალური მოძრაობის" ლიდერმა ნიკა მელიამ „ტვ პირველის" ეთერში განაცხადა, რომ როცა იდეური განსხვავება გაქვს შენს რამდენიმე თანამებრძოლთან, პროგრესსა და განვითარებაზე საუბარი შეუძლებელია, სადაც არ არის გუნდური სულისკვეთება, სადაც შეიძლება თვალის დაუხამხამებლად ადამიანმა ზურგში დანა ჩაგარტყას.