უკრაინის პრეზიდენტის ადმინისტრაციის ხელმძღვანელის მრჩეველმა, მიხაილო პოდოლიაკმა განაცხადა, რომ უკრაინაში რუსეთის შეჭრის დაწყებიდან დღემდე, 13 000-მდე უკრაინელი ჯარისკაცი დაიღუპა.

აღსანიშნავია, რომ მიხაილო პოდოლიაკის მიერ გაჟღერებული მონაცემები უკრაინის შეიარაღებულ ძალებში ჯერ არ დაუდასტურებიათ.

ივნისში პოდოლიაკმა განაცხადა, რომ ბრძოლის ველზე ყოველდღიურად 100-დან 200-მდე უკრაინელი ჯარისკაცი იღუპებოდა.

„ჩვენ გვაქვს გენერალური შტაბის ოფიციალური შეფასება, მთავარსარდლის ოფიციალური შეფასება და დაღუპულთა რაოდენობა 10 000-12 500-დან 13 000-მდე მერყეობს", - განაცხადა პოდოლიაკმა.

მისივე თქმით, დაღუპული მშვიდობიანი მოსახლეობის რაოდენობა შეიძლება მნიშვნელოვანი იყოს.

30 ნოემბერს, ევროკომისიის პრეზიდენტმა, ურსულა ფონ დერ ლაიენმა განაცხადა, რომ რუსეთის შეჭრის შემდეგ, უკრაინაში 20 000-მდე მშვიდობიანი მოქალაქე და უკრაინის არმიის 100 000-მდე სამხედრო მოსამსახურე დაიღუპა.